ەردوعان يزرايلدى «تەرروريست مەملەكەت» دەپ اتادى
تۇرىك رەسپۋبليكاسىنىڭ پرەزيدەنتى رەجەپ-تايىپ ەردوعان يزرايلدى «گازا سەكتورىندا اسكەري قىلمىس جاساپ، حالىقارالىق قۇقىقتى بۇزدى» دەپ ايىپتاپ، ونى «تەرروريست مەملەكەتكە» تەڭەدى.
ال حاماستى ول «پالەستينا حالقى تاڭداعان ساياسي پارتيا» دەپ اتادى. بۇل تۋرالى aa.com.tr حابارلادى.
انادولى اگەنتتىگىنىڭ مالىمەتىنە قاراعاندا، ەردوعان تۇركيا پارلامەنتاريلەرىنىڭ الدىندا سويلەگەن سوزىندە يزرايل پرەمەر-ءمينيسترى بەنيامين نەتانياحۋدىڭ قىزمەتتە ۇزاق قالمايتىنىن ايتتى.
يزرايل - تەرروريستىك مەملەكەت. مەن مۇنى اشىق ايتامىن. كەيبىرەۋلەر حاماستى تەرروريستىك ۇيىم دەيدى. مەن ونى تەرروريستىك ۇيىم دەپ ايتا المايمىن. ويتكەنى ول سايلاۋدا پالەستينا حالقىنىڭ داۋىسىن الىپ، جەڭىسكە جەتكەن. ونىڭ جەڭىسىن ا ق ش پەن يزرايل تارتىپ الىپ جاتىر، - دەدى ول.
ال يزرايل بولسا، وسى كۇندەرى كورشى ەلدەردىڭ ايىپتاۋلارىنا قاراماي، گازا سەكتورىندا سوعىسىپ جاتىر. مىسالى، يزرايلدىڭ قورعانىس اسكەرى (تساحال) گازاداعى «ءال-شيفا» اۋرۋحاناسىندا «حاماس راديكال توبى جاسىرىنعان جەرلەرگە وپەراتسيا» جۇرگىزىپ جاتقانىن مالىمدەدى.
يزرايل اسكەريلەرى بەيبىت حالىقتى اۋرۋحانادان جاپپاي كوشىرىپ، مەديتسينالىق مەكەمەنىڭ باسشىلىعىمەن حابارلاسىپ وتىرعانىن ايتادى. بۇل وپەراتسياعا اراب ءتىلىن بىلەتىن مەدقىزمەتكەرلەر مەن باسقا دا ادامدار قاتىسىپ جاتىر. ولار ارنايى دايىندىقتان ءوتتى، - دەپ مالىمدەدى تساحال.
قازىر اۋرۋحاناداعى ادام سانى بەلگىسىز. دۇنيەجۇزىلىك دەنساۋلىق ساقتاۋ ۇيىمى قىزمەتكەرلەرىنىڭ ايتۋىنشا، اۋرۋحانادا 4100 ادام (700 ناۋقاس، 400 قىزمەتكەر جانە شابۋىلدان قاشقان 3 مىڭ بەيبىت تۇرعىن) بار. بۇعان دەيىن حاماستىڭ باقىلاۋىنداعى دەنساۋلىق ساقتاۋ مينيسترلىگى «ءال-شيفادا» 2300 ادام بار (600-650 ناۋقاس، 200-250 قىزمەتكەر جانە 500 بەيبىت تۇرعىن) دەگەن.
ب ۇ ۇ- نىڭ گۋمانيتارلىق ماسەلەلەردى ۇيلەستىرۋ باسقارماسى گازا سەكتورىنىڭ سولتۇستىگىندە، ياعني گازا قالاسى مەن ونىڭ اينالاسىنداعى 24 اۋرۋحانانىڭ اراسىندا ناۋقاستاردى قابىلدايتىن ءبىر عانا اۋرۋحانا - «ءال-احلي» قالعانىن حابارلادى.
ب ۇ ۇ مالىمەتىنشە، 18 اۋرۋحانا تولىعىمەن جابىلىپ، ونداعى ناۋقاستار مەن قىزمەتكەرلەر ەۆاكۋاتسيالانعان. ۇشەۋى - «ءان-ناسر»، «ءار-رانتيسي» مەن «ءال-كۋدس» كەيىنگى ءۇش كۇندە جابىلعان.
قالاداعى ەڭ ۇلكەن «ءال-شيفا» اۋرۋحاناسى مەن تاعى 5 اۋرۋحانا پاتسيەنتتەرگە نەگىزگى كومەكتى كورسەتىپ جاتىر.
