ەردوعان ىشكى ماسەلەلەردى ساياسيلاندىرۋ ارەكەتى ءۇشىن وپپوزيتسيانى سىنعا الدى
استانا. KAZINFORM - تۇركيا پرەزيدەنتى رەجەپ تايىپ ەردوعان ستامبۇل مەرىنىڭ جاقىندا ۇستالۋىنا العاش رەت پىكىر ءبىلدىردى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
مالىمدەمەسىندە ەردوعان وپپوزيتسيانى، اسىرەسە رەسپۋبليكالىق حالىقتىق پارتيانى (ر ح پ)، ىشكى قاقتىعىستارىن جانە زاڭعا قاتىستى ماسەلەلەرىن ساياسيلاندىرۋعا ۇمتىلدى دەپ ايىپتادى. ول وپپوزيتسيانىڭ مۇنداي وقيعالاردى ۇلتتىق دەڭگەيدەگى پروبلەماعا اينالدىرۋدى ادەتكە اينالدىرعانىن اتاپ ءوتتى، الايدا بۇل ماسەلەلەر تەك بەلگىلى ءبىر شاعىن توپقا عانا قاتىستى. ەردوعان بۇل ارەكەتتەردى ەكىجۇزدىلىك دەپ اتاپ، ولاردىڭ قوعامنىڭ نازارىن مەملەكەتتىڭ ناقتى ماسەلەلەرىنەن باسقا جاققا بۇرۋعا باعىتتالعانىن ايتتى.
- ەگەر بايقاعان بولساڭىز، وپپوزيتسيا، ونىڭ ىشىندە ر ح پ، سوت ورگاندارى قويعان ايىپتاۋلارعا ەشقاشان ناقتى جاۋاپ بەرە المايدى. بۇل ديپلومدارعا، جەمقورلىققا نەمەسە ۇرلىققا قاتىستى بولسىن، ولار ءاردايىم قاراپايىم جولدى تاڭدايدى - ساياسي ۇراندارمەن شەكتەلىپ، حالىقتى الداۋعا تىرىسادى، - دەدى ەردوعان.
تۇركيا پرەزيدەنتى سونداي-اق وپپوزيتسيانىڭ قۇقىق قورعاۋ ورگاندارى مەن سوت جۇيەسىنە قىسىم جاساپ، ولاردى وزدەرىنىڭ ىشكى ماسەلەلەرىن شەشۋ ءۇشىن پايدالانۋعا تىرىساتىنىن اتاپ ءوتتى. ەردوعاننىڭ پىكىرىنشە، مۇنداي ارەكەتتەر ەلدىڭ بەدەلىنە نۇقسان كەلتىرىپ قانا قويماي، ەلدەگى قازىرگى جاعداي تۋرالى جالعان تۇسىنىك قالىپتاستىرادى.
- ءبىز جالعان اقپاراتتىڭ، جالا جابۋدىڭ جانە شىندىقتى جوققا شىعارۋدىڭ قيراتۋشى كۇشىن اقيقاتتىڭ ۇستەمدىگىمەن، ادىلدىككە، زاڭعا جانە ار- وجدانعا باعىنۋمەن جەڭەمىز، - دەدى ول.
ەردوعاننىڭ ايتۋىنشا، ساياسي الاڭداعى ىشكى قاقتىعىستار ۇلتتىق ماسەلەلەرمەن تەڭەستىرىلمەۋى كەرەك. ونىڭ پىكىرىنشە، وپپوزيتسيا ايىپتاۋلارعا ساياسي مانيپۋلياتسيالارمەن ەمەس، كونسترۋكتيۆتى تۇردە جاۋاپ بەرۋدى ۇيرەنۋى ءتيىس.
ايتا كەتەلىك ىستامبۇلدا 100 دەن استام ادام، ونىڭ ىشىندە قالا باسشىسى ەكرەم يماموگلۋ تۇتقىنعا الىنعان ەدى.
