ەردوعان - تۇرىكمەنستاننىڭ قۇرمەتتى اقساقالى اتاندى

«تۇرىكمەن حالقىنا كوپ عاسىرلىق تاتۋ كورشىلىك ءداستۇرىن ۇستانا وتىرىپ جانە اعا ۇرپاق وكىلدەرىن قۇرمەتتەي وتىرىپ، تۇرىكمەنستان-تۇركيا قارىم-قاتىناستارىن دامىتۋعا قوسقان زور جەكە ۇلەسىڭىزدى، حالىقتارىمىزدىڭ بىرلىگى جولىنداعى قىزمەتتەرىڭىزدى جوعارى باعالاي وتىرىپ، 70 جىلدىق مەرەيتويىڭىزعا وراي سىزگە تۇرىكمەنستاننىڭ «Hormatly il ‎aşulusy» («تۇركىمەنستاننىڭ قۇرمەتتى اقساقالى») قۇرمەتتى اتاعىن بەرۋ تۋرالى شەشىم قابىلداندى»، - دەلىنگەن بەردىمۇحامەدوۆتىڭ ەردوعانعا جولداعان قۇتتىقتاۋ حاتىندا.

بەردىمۇحامەدوۆتىڭ ايتۋىنشا، ەلدىڭ سىرتقى ساياساتىنىڭ ماڭىزدى باعىتتارىنىڭ ءبىرى تۇركيامەن ءتۇرلى سالالارداعى ستراتەگيالىق جانە ۇزاق مەرزىمدى قارىم-قاتىناستاردى دايەكتى تۇردە دامىتىپ، نىعايتۋ بولىپ تابىلادى. تۇرىكمەنستان پرەزيدەنتى سونداي-اق ەكى ەلدىڭ حالىقارالىق ۇيىمدار، سونىڭ ىشىندە بىرىككەن ۇلتتار ۇيىمى مەن تۇركى مەملەكەتتەرى ۇيىمى اياسىنداعى تابىستى ىنتىماقتاستىعىن اتاپ ءوتتى.

ونىڭ ايتۋىنشا، تۇركيا تۇرىكمەنستاننىڭ ءىرى سىرتقى ساۋدا سەرىكتەستەرىنىڭ ءبىرى بولىپ تابىلادى جانە ەلدەگى ەكونوميكالىق جوبالاردى جۇزەگە اسىرۋعا قاتىساتىن كوپتەگەن تۇرىك كومپانيالارى تۇرىكمەنستان ەكونوميكاسىن ءارتاراپتاندىرۋعا جانە الەۋمەتتىك جوبالاردى جۇزەگە اسىرۋعا ۇلەس قوسۋدا.

بەردىمۇحامەدوۆ ەردوعاندى بارشا تۇرىكمەن حالقىنىڭ اتىنان شىن جۇرەكتەن قۇتتىقتاپ، زور دەنساۋلىق، باقىت جانە وتباسىلىق كەلىسىم، ال تۇركيا رەسپۋبليكاسىنىڭ حالقىنا بەيبىتشىلىك، ودان ءارى دامۋ مەن گۇلدەنۋ تىلەدى.

رەجەپ تايپ ەردوعان 1954-جىلى 26-اقپاندا ىستانبۇلدىڭ بەيوعلۋ اۋدانىنا قاراستى كاسيمپاشا اۋدانىندا جاعالاۋ كۇزەتشىسىنىڭ وتباسىندا دۇنيەگە كەلگەن. ول 2014 -جىلدىڭ 28-تامىزىنان بەرى تۇركيانىڭ پرەزيدەنتى. بۇعان دەيىن ەردوعان 2003-2014 -جىلدارى تۇركيا پرەمەر-ءمينيسترى، 1994-1998 -جىلدارى ىستانبۇل مەرى قىزمەتىن اتقارعان. ول بيلىكتەگى «ادىلەت جانە دامۋ» پارتياسىنىڭ نەگىزىن قالاۋشى.

اۆتور

ايدار وسپاناليەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى