ەردوعان «ارانداتۋشىلىقتى توقتاتۋعا» شاقىردى
استانا. KAZINFORM - تۇركيادا سوڭعى جىلدارداعى ەڭ ءىرى ۇكىمەتكە قارسى شەرۋلەر التى كۇن بويى جالعاسىپ جاتىر، دەپ حابارلايدى Euronews.
تۇركيا قالالارىندا مىڭداعان ادام كوشەگە شىعىپ، شەرۋگە قاتىسىپ جاتىر. ولار ىستانبۇل مەرى ەكرەم يماموگلىنىڭ بوساتىلۋىن جانە مەرزىمىنەن بۇرىن پرەزيدەنت سايلاۋىن وتكىزۋدى تالاپ ەتىپ، ىستانبۇل قالالىق اكىمشىلىگىنىڭ الدىنا جينالدى.
تۇركيا پرەزيدەنتى رەجەپ تايىپ ەردوعان «ارانداتۋشىلىقتى توقتاتۋعا» شاقىردى.
رەجەپ تايىپ ەردوعان دۇيسەنبى كۇنگى ۇكىمەت وتىرىسىنان كەيىن تەلەديدار ارقىلى سويلەگەن سوزىندە وپپوزيتسيالىق رەسپۋبليكالىق حالىق پارتياسىن قوعامدىق ءتارتىپتى بۇزدى دەپ ايىپتاپ، شەرۋلەردى «زورلىق- زومبىلىق قوزعالىسى» دەپ اتادى.
- مەن بۇل شاقىرۋدى بىرنەشە رەت جاسادىم، بۇگىن دە قايتالاپ ايتامىن: ارانداتۋشىلىقپەن ازاماتتارىمىزدىڭ تىنىشتىعىن بۇزۋدى توقتاتىڭىز، - دەدى ەردوعان.
ول سونداي-اق رەسپۋبليكالىق حالىق پارتياسىنىڭ ءتوراعاسى وزەل وزگۋردى تارتىپسىزدىكتەر ءۇشىن سوت الدىندا جاۋاپ بەرەتىنىن ايتىپ قورقىتتى.
- ارينە، بۇل ارەكەتتەر ءۇشىن پارلامەنتتە ساياسي جاۋاپكەرشىلىك جانە سوتتا زاڭدى جاۋاپكەرشىلىك بولادى، - دەدى رەجەپ تايىپ ەردوعان.
ايتا كەتەيىك، 19-ناۋرىز كۇنى ىستانبۇل مەرى جانە تۇركيا پرەزيدەنتى رەجەپ تايىپ ەردوعاننىڭ باستى ساياسي قارسىلاسى ەكرەم يماموگلۋدى قاماۋعا الۋ تۋرالى وردەر شىققان بولاتىن.
سودان كەيىن ىستانبۇل مەرى ەكرەم يماموگلۋ ارنايى وپەراتسيا كەزىندە ۇستالدى.
ىستانبۇل، انكارا، يزمير جانە ريزە قالالارىندا جاپپاي نارازىلىق شەرۋلەرى ءوتتى.
