پەرۋدە جارتى عاسىر ىشىندە مۇزدىقتاردىڭ جارتىسىنان كوبى جويىلدى
سارسەنبى كۇنى جاريالانعان ەسەپ بويىنشا، كەيىنگى الپىس جىلدا پەرۋ تروپيكالىق مۇزدىقتارىنىڭ %56 ءىن جوعالتقان، وعان كليماتتىڭ وزگەرۋى سەبەپ بولدى. Kazinform بۇل تۋرالى Reuters اگەنتتىگىنە سىلتەمە جاساپ حابارلايدى.
ەسەپتە 2020-جىلعا دەيىن سپۋتنيكتەن تۇسىرىلگەن سۋرەتتەر پايدالانىلعان. 1962-جىلى مۇز بەن قار 2399 شارشى شاقىرىم جەردى الىپ جاتقان بولسا، كەيىنگى سۋرەتتەردە اۋقىمى 1050 شارشى شاقىرىمعا كىشىرەيگەن.
اۋا تەمپەراتۋراسىنىڭ جوعارىلاۋى مۇزدىقتاردىڭ ەرۋىنە جانە جاڭا شاعىن تاۋ مۇيىستەرىنىڭ پايدا بولۋىنا اكەپ سوقتى، دەپ حابارلادى تاۋ مۇزدىقتارى مەن ەكوجۇيەنى زەرتتەۋ ۇلتتىق ينستيتۋتى.
«جاڭا مۇيىستەر بولاشاقتا سۋ رەزەرۆۋارىنا اينالۋى مۇمكىن، ءبىراق بيىكتە ورنالاسقاندىقتان، قاۋىپ توندىرەدى. سەبەبى ولار تولىپ، تاسۋى ىقتيمال»، - دەدى قورشاعان ورتا مينيسترلىگىندە مۇزدىقتاردى زەرتتەۋ ديرەكتورى حەسۋس گومەس.
ەسەپ بويىنشا، پەرۋدىڭ 20 ميلليونعا جۋىق تۇرعىنى مۇزدىقتاردان اعاتىن سۋدىڭ تىكەلەي نەمەسە جاناما تۇردە پايداسىن كورىپ جاتىر.
«بۇل - سۋ قورىنىڭ جارتىسىنان كوبىن جوعالتقانىمىزدى بىلدىرەدى»، - دەدى قورشاعان ورتا ءمينيسترى البينا رۋيس. سونداي-اق ول مۇزدىقتاردىڭ قايتۋى تاۋ ەكوجۇيەسىنە اسەر ەتەتىنىن اتاپ ءوتتى.
