«ەۋرازيا» كينوفەستيۆالىنىڭ جەڭىمپازدارى بەلگىلى بولدى

فەستيۆالدىڭ ءاربىر كۇنى قىزىقتى ءىس- شارالارعا تولى بولدى. كۇندەلىكتى بايقاۋعا قاتىسقان فيلمدەردىڭ كورسەتىلىمدەرى، كەيبىر كارتينالار ۇلكەن ەكراندا العاش رەت كورسەتىلدى.

ال، كورەرمەندەر تۋىندى اۆتورلارىمەن كەزدەسىپ، تولعاندىرعان سۇراقتارىنا جاۋاپ الدى. بيىل فەستيۆال باعدارلاماسىنا 30 عا جۋىق فيلم ەنىپ، ونىڭ 22  ەكى نەگىزگى بايقاۋعا ىرىكتەلىپ الىندى.

15 ەلدىڭ كينەماتوگرافيستەرىن جيناعان حالىقارالىق فەستيۆال ورتالىق ازيا مەن تۇركى الەمى ەلدەرىنە ارنالدى. قازىلار القاسىنىڭ شەشىمىمەن ەكى فيلم فەستيۆالدىڭ باس جۇلدەسىن الدى.

جەڭىمپاز فيلمدەر تەك جۇلدەگە قول جەتكىزىپ قانا قويعان جوق. ولاردىڭ تەرەڭ ەموتسيونالدى جانە كوركەمدىك بىرەگەيلىگى ارقىلى كوزگە تۇسكەن فيلمدەرى كاسىبي مامانداردىڭ پىكىر الماسۋىنا ارقاۋ بولدى. وسىلايشا، كينو ونەرىنىڭ ادامداردى بىرىكتىرىپ، وتكىر ماسەلەلەردى كوتەرە الاتىندىعى تاعى دا دالەلدەندى.

ورتالىق ازيا جانە تۇركى الەمى ەلدەرى بايقاۋىنىڭ ەڭ ۇزدىك فيلم اتالىمىندا «اق تىرنالار بيلەيتىن جەردە» (ساحا رەسپۋبليكاسى، رەسەي) فيلمى جەڭىسكە جەتتى. بەينەشىلىك پەن كوركەم پوەزياعا تولى بۇل كارتينا سالت- ءداستۇردى ساقتاي وتىرا قازىرگى زاماننىڭ سىناقتارىندا توتەپ بەرۋگە شاقىرادى.

ەكىنشى گران- پري پولياك رەجيسسەرى گجەگوج دەبوۆسكيدىڭ «جوقتىڭ قاسى» فيلمىنە بۇيىردى. بۇل مينيماليستىك شىعارما جالعىزدىق پەن ەركىندىك اراسىنداعى نازىك شەكارانى زەرتتەپ، كورەرمەندەردى ءومىردىڭ ءمانى تۋرالى ويلانۋعا يتەرمەلەيدى.

«جۇمىسىمىزدىڭ ۇزدىك دەپ تانىلعانىنا قاتتى تاڭ قالدىم جانە وتە قۋانىشتىمىن. قازىر ەموتسيامدى سوزبەن جەتكىزە الماي تۇرمىن. فەستيۆالدە كوپتەگەن جاقسى جانە قىزىقتى فيلمدەر مەن تالانتتى رەجيسسەرلەر بولعانىن بىلەمىن. بۇل ءبىز ءۇشىن ۇلكەن مارتەبە. ءبىز بۇل فيلمدى نەبارى 17 كۇندە تۇسىردىك. بۇل بيۋدجەتتىك فيلم جانە ءبىز دەرەكتى فيلم ادىستەرىن قولداندىق، اكتەرلەرمەن سول ادامدار تۇراتىن ناقتى جەرلەردە تۇسىردىك. مەنىڭ ويىمشا، ءدال وسى ءتاسىل فيلمدى ەرەكشە ەتتى»، - دەيدى رەجيسسەر گجەگوج دەبوۆسكي.

سونىمەن قاتار، ۇزدىك اكتەرلەر مەن رەجيسسەرلەر انىقتالدى. سونىمەن، ورتالىق ازيا جانە تۇركى الەمى ەلدەرىنىڭ بايقاۋىندا كىمدەر جەڭىمپاز اتاندى:

- ەڭ ۇزدىك ايەل ءرولى ءۇشىن «عاشىقتار تاۋى» فيلمىنە تۇسكەن اكتريسا ەلزا كاريموۆا ماراپاتتالدى.

- قىرعىزستاندىق «شەكاراداعى مامىلە» فيلمىندە باستى ءرولدى سومداعان ابىلاي مارات ەڭ ۇزدىك ەر ادام ءرولى ءۇشىن ماراپاتتالدى.

- قازىلار القاسىنىڭ ارنايى سىيلىعى رەجيسسەر مۋرات فيراتوگلۋ تۇسىرگەن «حەممە ولەتىن كۇننىڭ بىرىندە» فيلمىنە بەرىلدى. كارتينا الەۋمەتتىك ادىلەتسىزدىك، توزىمدىلىك جانە بوستاندىق ءۇشىن كۇرەس تۋرالى سۇراقتاردى كوتەرەدى. قازىلار القاسى رەجيسسەردىڭ شيەلەنىس ساتتەرىن جانە اسەرلى اتموسفەرانى شەبەرلىكپەن كورسەتە العانىن ەرەكشە اتاپ ءوتتى.

- ءشاريپا ورازبايەۆانىڭ «تۇل» فيلمىن قازىلار القاسى ەرەكشە اتالىم بويىنشا ماراپاتتادى.

- ورتالىق ازيا مەن تۇركى الەمى ەلدەرى اراسىنداعى بايقاۋدا ۇزدىك رەجيسسۋرا ماراپاتىنا يە بولعان «جوقتاۋ» فيلمى ءداستۇرلى ازا تۇتۋ ءراسىمى ارقىلى دۇنيەدەن وزعان ادامنىڭ كەيپىن ماڭگى ەستە ساقتاۋدىڭ تەرەڭ ماعىناسىن اشا الدى.

- حالىقارالىق بايقاۋدا ەڭ ۇزدىك ايەل ءرولى ءۇشىن فلورەنتينا حولتسيەنگەر (اۋستريا، «اي» فيلمى) ماراپاتتالدى. سونداي- اق، ارتۋر پاچەسنىي «جوقتىڭ قاسى» فيلمىندەگى شيەلەنىستى كەرەمەت كورسەتە العانى ءۇشىن جۇلدەگەر اتاندى. اسيف يسلامنىڭ (بانگلادەش) «نيرۆانا» ءفيلمى ۆيزۋالدى بەينەلەردى جاڭاشا قولدانۋ جانە ولاردىڭ فيلوسوفيالىق استارى ءۇشىن قازىلار القاسىنىڭ ارنايى سىيلىعىنا يە بولدى. وڭتۇستىك كورەيالىق رەجيسسەر و چجون مين «جىل ماۋسىمدارى ءۇيى» ءفيلمى ءۇشىن ۇزدىك رەجيسسۋرا اتالىمى بويىنشا ماراپاتقا يە بولدى. تۋىندىنىڭ كۇردەلى قۇرىلىمى جانە فيلوسوفيالىق وي تەرەڭدىگى كورەرمەندەردى تاڭعالدىردى.

سونداي- اق، جابىلۋ سالتاناتىندا ارنايى سىيلىقتار تابىس ەتىلدى:

- NETPAC قازىلار القاسىنىڭ سىيلىعى رەجيسسەر ماحدي فلەيفەلدىڭ «بەلگىسىز ەلگە» تۋىندىسىنا بەرىلدى.

- حالىقارالىق بايقاۋ قازىلار القاسىنىڭ ءتوراعاسى نۋري بيلگە دجەيلان «الەمدىك كينەماتوگرافياعا قوسقان ەرەكشە ۇلەسى ءۇشىن» ماراپاتىنا يە بولدى. سونداي- اق، ايگىلى قازاقستاندىق اكتەر دوسحان جولجاقسىنوۆ «قازاق كينەماتوگرافىنا قوسقان ەرەكشە ۇلەسى ءۇشىن» ارنايى سىيلىعىنىڭ يەگەرى اتاندى.

فەستيۆال شىن مانىندە قازاقستان كينوسىنىڭ جەتىستىكتەرىن تانىتۋ الاڭىنا اينالدى.

اۋقىمدى شارانى ق ر مادەنيەت جانە اقپارات مينيسترلىگى مەن شاكەن ايمانوۆ اتىنداعى «قازاقفيلم» ۇلتتىق كينوستۋدياسى ۇيىمداستىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى