قىزىمنىڭ اتىن ياسينا دەپ قويدىق - 20 ميلليونىنشى تۇرعىننىڭ اكەسى
اقمولا وبلىسىنىڭ بۋراباي اۋدانىندا دۇنيەگە كەلگەن قازاقستاننىڭ 20 ميلليونىنشى تۇرعىنى ياسينانىڭ اكەسى ايدار يسەنوۆ Kazinform تىلشىسىمەن قۋانىشىن ءبولىستى.
ايداردىڭ ايتۋىنشا، بۇل - يسەنوۆتار وتباسىنداعى ەكىنشى بالا.
- ەكىنشى پەرزەنتىمىز. تۇڭعىشىمىز ۇل بالا، ەسىمى دىلمۇحامەد، ەكى جاستا. جولداسىم دينارا 14- قاراشا ساعات 08:10 بوساندى. كەيىن ماعان ءوزى حابارلاسىپ، قىز تۋعانىن جانە قازاقستاننىڭ 20 ميلليونىنشى تۇرعىنى ەكەنىن جازدى. ۇلدان كەيىن قىزىمنىڭ دۇنيەگە كەلگەنىنە قاتتى قۋاندىم. ءبىراق، 20 ميلليونىنشى تۇرعىن بولعانىنا ونشا سەنە قويمادىم، ءازىل شىعار دەپ ويلادىم. ال تاڭەرتەڭ ماعان رەسمي حابارلادى. سول كەزدە قۋانىشىم ودان سايىن ەسەلەنە ءتۇستى. ءالى دە ءوز وزىمە سەنە الماي وتىرمىن، - دەپ قۋانىشىن ءبولىستى ايدار.
وتاعاسىنىڭ ايتۋىنشا، جاڭا تۋعان ءسابيىنىڭ ەسىمىن ياسينا دەپ قويعان.
- جۇبايىم ەكەۋىمىز اقىلداسا كەلە قىزىمىزدىڭ ەسىمىن ياسينا دەپ قويدىق. ونى جولداسىم جۇكتى بولعان كەزدە اقىلداسىپ قويدىق، - دەپ قوستى ايدار.
ايدار مەن دينارا بۋراباي اۋدانىنىڭ جاسىل اۋىلىندا تۇرادى. وتاعاسى ەليەۆاتوردا جۇمىس ىستەسە، جۇبايى مەكتەپتە باستاۋىش سىنىپ مۇعالىمى.
«جۇمىستاعى ارىپتەستەرىم ەستىپ، قۇتتىقتاپ مەنى پەرزەنتحاناعا شىعارىپ سالدى. وندا ادام كوپ، ءوزىم نە بولعانىن تۇسىنبەي قالدىم. اكىم مەن جۋرناليستەردى كورگەندە تىپتەن ابدىراپ قالدىم. وبلىس اكىمى قۇتتىقتاپ، تۋۋ تۋرالى كۋالىكتى تاپسىردى، وندا قىزىمنىڭ 20 ميلليونىنشى تۇرعىن ەكەنى كورسەتىلگەن. سونداي-اق، وتباسى بانكىنىڭ 2 ميلليون تەڭگەلىك سەرتيفيكاتى تابىستالدى. بۇل - قىزىمنىڭ اتىنا تۇسەتىن دەپوزيتتىك اقشا. بۇدان باسقا دا سىيلىقتار بولدى. وسىنداي قۋانىشىما ورتاقتاسقان ادامدارعا شىنايى العىسىمدى ايتامىن. قىزىم ءوسىپ ەلدىڭ بەلدى ءبىر ازاماتى بولاتىنىنا سەنەم، - دەپ تۇيىندەدى ايدار.
ايتا كەتسەك، بۇدان بۇرىن چۋچە قالاسىنداعى «اۆيتسەننا-بۋراباي» ج ش س ديرەكتورى ەۆگەني بەكايەۆ قازاقستاننىڭ 20 ميلليونىنشى تۇرعىنى - قىز بالا دۇنيەگە كەلگەنىن جەتكىزگەن ەدى.
