قىزىلوردالىق ەرەكشە جۇپ قالاي شاڭىراق كوتەردى

نۇرمۇحامەد ءابىلقاسىموۆتى جۇرت اۋزىنا تاياقشا تىستەپ، سمارتفون ارقىلى ولەڭ جازاتىن اقىن رەتىندە تانيدى. ول - «تاعدىر مەن جازا»، «تاسجارعان» كىتاپتارىنىڭ اۆتورى.

تاعى ءبىر جىر جيناعى قولعا تيەتىن كۇن الىس ەمەس. سونداي-اق حالىقارالىق «شابىت» فەستيۆالىنىڭ لاۋرەاتى، وبلىس اكىمى تاعايىنداعان «تۇران» سىيلىعىنىڭ يەگەرى.

ايگەرىم ەكەۋىنىڭ شاڭىراق كوتەرگەنىنە بيىل - 10 جىل. نەبارى ءۇش كۇن ىشىندە تانىسىپ، كەزدەسىپ، كوڭىل قوسقان.

تاعدىر اۋىرتپالىعىنا مويىماعان اقىن جۇبايىن جولىقتىرعان ءساتتى ەرەكشە تولعانىسپەن ەسكە الادى.

- قارىنداسىم جۇلدىزعا «اعاڭا قىز قاراپ ءجۇر، ۇيلەنەتىن كەز كەلدى» دەيتىنمىن. ءبىر كۇنى مۇمكىندىگى شەكتەۋلى جاندار اراسىندا وبلىستىق جارىس وتەتىن بولدى. سوعان باراردا قارىنداسىم «اعا، ءوزىڭىز دە قۇر جۇرمەڭىز» دەپ شىعارىپ سالدى. سودان نە كەرەك، ءبىر ويىم جارىستا، ءبىر ويىم قىز ىزدەۋدە. ومىرىمدە قىزدار كەزدەسپەدى ەمەس، كەزدەستى. ءبىراق ولاردىڭ كوزىنەن «ەرتەڭىمىز قالاي بولادى؟» دەگەن قورقىنىشتى كورەتىنمىن. اللا وسى جولى قارىنداسىمنىڭ اۋزىنا ادەيى سالعان سياقتى. ويىن اياقتالىپ، سىرتقا شىققانىمدا دالىزدە جۇرگەن ەكى جاس قىزعا كوزىم ءتۇستى. سۇراستىرا كەلە بىلگەنىم، ەكەۋى دە تۇرمىس قۇرماعان. مەن دە ولارعا قيىندىقپەن قالاي كۇرەسىپ كەلە جاتقانىمدى، كىتاپ جازعانىمدى، ادال ءارى قاراپايىم قىز ىزدەپ جۇرگەنىمدى ايتتىم. اڭگىمەمدى ايگەرىم مۇقيات تىڭداپ وتىر ەكەن. جالت بۇرىلعانىمدا ەكەۋمىزدىڭ جانارىمىز ءتۇيىسىپ، مەن ىزدەگەن قىز وسى دەگەن وي كەلدى. 2015-جىلى رامازان ايىندا جەڭگەڭمەن تانىسىپ، ءۇشىنشى كۇنى الىپ قاشتىم، - دەيدى نۇرمۇحامەد ءابىلقاسىموۆ.

ايگەرىم توركىنى قارسى بولۋى مۇمكىن ەكەنىن ويلاپ، جىگىت جاقتىڭ قۇدا ءتۇسىپ كەلۋىن قوشتاماپتى.

بۇلاردىڭ جاراسىمدى ءومىر سۇرەتىنىنە سەنبەگەندەر كوپ بولعان. الايدا ءومىر اعىمى مۇلدەم باسقانى كورسەتتى.

- وبلىس ورتالىعىنداعى جارىسقا ول شاحمات، مەن ۇستەل تەننيسى سپورتىنان قاتىستىق. سول جەردە ءبىر-ءبىرىمىزدى ۇناتىپ قالدىق. ءبىزدى اللا قوستى. جار تاڭداۋدا قاتەلەسپەگەنىمە قۋانامىن. نۇرەكەڭ ايەلدى سىيلاي بىلەدى. مەنى دە، بالالارىن دا اركەز قولداپ وتىرادى. وتىرىك سويلەگەندى، كولگىرسىگەندى ۇناتپايدى، - دەيدى اقىننىڭ جارى.

قىز الىپ قاشۋدىڭ ءوز قىزىعى بار. قىزى ۇيىنە ورالماعاسىن اناسى ۋايىمداپ پوليتسياعا جۇگىنگەن.

ايگەرىمنىڭ قايدا ەكەنىن بىلگەننەن كەيىن قىز جاق نۇرمۇحامەدتىڭ اۋىلىنا كەلىپ، بۇل ۇيدەگىلەر ابىر-سابىر كۇيگە ءتۇسىپتى.

- ايگەرىمنىڭ ءوز ەركىمەن كەلگەنىن ەستىگەن سوڭ عانا قۋعىنشىلاردىڭ كوڭىلى ورنىنا ءتۇستى. ونىڭ اناسىنا «اۋرۋدى تىلەپ ءيا قولدان جاساپ العان جوقپىن. وسى كۇندى 37 جىل بويى كۇتتىم. قىزىڭىزدى باقىتتى قىلام دەپ ايتا المايمىن. ءبىراق باقىتتى قىلۋعا تىرىسامىن» دەدىم. ويتكەنى مۇگەدەكتەر ارباسىنا تاڭىلسام دا ءبىر وتباسىنىڭ جاعدايىن جاساي الاتىنىما سەنەتىنمىن. ايگەرىمنىڭ اناسىنا بەرگەن ۋادەمدە تۇرعان سياقتىمىن، - دەيدى نۇرمۇحامەد ءابىلقاسىموۆ.

ەرلى-زايىپتىلاردىڭ قالقامان مەن قاراقات ەسىمدى ەگىز بالالارى بار. «ەندىگى جەردە سولاردىڭ قىزىعىن كورسەم» دەيدى اقىن كەيىپكەرىمىز.

ەسكە سالساق، ەلىمىزدە 15-ءساۋىر - عاشىقتار كۇنى رەتىندە اتالىپ ءوتىپ كەلەدى. ول 2011-جىلى 14-اقپان - اۋليە ۆالەنتين كۇنىنە بالاما رەتىندە پايدا بولدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى