قىزىلوردالىق كاسىپكەر بودەنە باعىپ، ايىنا 1 ميلليون تەڭگە تابادى
قىزىلوردا. KAZINFORM - قىزىلوردا وبلىسى جاڭاقورعان اۋدانىنىڭ تۇرعىنى نازيرا بەلسەنبايەۆا بودەنە باعىپ، ايىنا 1 ميلليون تەڭگە تابىس تاۋىپ وتىر.
نازيرا بەلسەنبايەۆا بۇل جوسپارىن «اۋىل اماناتى» ۇلتتىق جوباسى ارقىلى جۇزەگە اسىرىپ وتىر. قازىر بودەنە شارۋاشىلىعىن دوڭگەلەتۋدە. كاسىپتى ۇيرەنە ءجۇرىپ، وزگەلەرگە دە ونىڭ قىر-سىرىن ايتىپ كەلەدى.
قازىر بودەنە باعۋدىڭ قىر-سىرىن جاقسى مەڭگەردى. كۇنىنە 1000 نان اسا جۇمىرتقانى ساۋداعا شىعارادى. وعان قوسا بودەنە ەتىمەن اۋدانداعى مەيرامحانالار مەن تاماقتانۋ ورىندارىن قامتاماسىز ەتىپ، استانا قالاسىنا دا جونەلتۋدە.
«مەن «اۋىل اماناتى» جوباسىمەن 3 ميلليون تەڭگە كولەمىندە نەسيە الدىم. وعان ەكى مىڭنان استام قۇس جانە قاجەتتى جابدىقتار ساتىپ الدىم. جەرگىلىكتى تۇرعىندارىنىڭ اراسىندا وسى ونىمگە دەگەن سۇرانىس جوعارى. وسىعان بايلانىستى نەبارى ءبىر ايدىڭ ىشىندە كاسىبىم ورگە استى. قازىر 1 ميلليون تەڭگە تابىس تابۋعا مۇمكىندىك تۋىپ تۇر. بودەنە ءار 16 ساعات سايىن جۇمىرتقالايدى»، - دەيدى ول.
نازيرا بەلسەنبايەۆا جاز ايىندا اتالمىش باعدارلاما ارقىلى تاعى دا نەسيە الۋدى كوزدەپ وتىر. باعدارلامانىڭ ەكىنشى ءبولىمى ارقىلى كاسىبىن كەڭەيتپەكشى. سول ماقسات جۇزەگە اسسا، ارنايى فەرما اشۋدى جوسپارلاپ وتىر.
ەسكە سالساق، بۇدان بۇرىن قىزىلوردا وبلىسىندا اباي جانە دوسان ەلدى مەكەندەرىنە گاز قوسىلدى.
