قىزىلوردالىق 62 جاستاعى ايەل كولىك دوڭگەلەگىن جوندەپ ءجۇر
قىزىلوردا. KAZINFORM - قىزىلوردا وبلىسى شيەلى اۋدانىنىڭ ورتالىعىندا 15 جىلدان بەرى كولىك دوڭگەلەگىن جوندەۋمەن اينالىسىپ جۇرگەن ايەل تۇرادى.
62 جاستاعى نۇرجامال وماروۆا بۇل كاسىپكە ويلاماعان جەردەن كەلگەن. ول ساتۋشى ماماندىعى بويىنشا وقۋ بىتىرگەنىمەن تۇرمىسقا شىققاسىن 16 جىل بويى اۋداندىق مادەنيەت ۇيىندە تازالىقشى بولعان.
جولداسى سابىرحان اقانوۆ 1993 -جىلى اۋداندا العاشقىلاردىڭ ءبىرى بولىپ كولىك جوندەۋ ورتالىعىن اشقان. ءبىراق ون شاقتى جىلدان كەيىن دەنساۋلىعى سىر بەرىپ، كاسىپتەن قول ۇزۋگە تۋرا كەلەدى. نۇرجامال اپا وتباسىلىق كاسىپتى ورتا جولدان تاستاۋعا قيمايدى.
- بۇرىن كۇيەۋىم جۇمىس ىستەپ جاتقاندا دوڭگەلەكتى قالاي جوندەيتىنىن كورەتىنمىن. ول اۋىرىپ قالعاندا ۇيرەنگەنىمدى جەتىلدىرىپ، كاسىپتى ارى قاراي جالعاستىرۋعا بەل بۋدىم. اۋەلگىدە باللونعا جەل بەرۋ ءۇشىن 10 تەڭگە الاتىنبىز. قازىر 50 تەڭگەگە كوتەرىلدى. ودان بولەك كولىك اككۋمۋلياتورىن تەكسەرىپ، قۋاتتايمىن. دوڭگەلەگىن تەڭگەرىپ، جەل بەرەمىن، جامايمىن. كومەگىمە جۇگىنۋشىلەر سانى ءار كەزدە ءارقالاي. ورتالىققا كەلۋشىلەر قاراسى، اسىرەسە، كوكتەم مەن كۇزدە كوبەيەدى، - دەيدى كەيىپكەرىمىز.
«ءبىر وزىڭىزگە دوڭگەلەكتى الىپ، سالۋ قيىن ەمەس پە؟» دەگەن سۇراعىمىزعا نۇرجامال اپا «وڭاي جەردە نان جوق» دەپ قىسقا قايىردى. ول كىسىدەن جۇمىستىڭ قىر-سىرىن ۇيرەنىپ، ءوز الدىنا كولىك جوندەۋ ورتالىعىن اشقان جاستار بار.
- كەلۋشىلەردەن كوبىنە جاعىمدى پىكىر ەستيمىن. جۇمىستى ادال اتقارۋعا تىرىسامىن. وزىمە سەنىمدى بولعان كۇندە دە ۇيلەرىنە امان-ەسەن جەتىپ الۋىن تىلەپ، ۋايىمداپ وتىرامىن. كولىك جۇرگىزۋشىلەر قىستىڭ سۋىعىندا، جازدىڭ ىستىعىندا جولدا قالىپ قويماسا دەيمىن، - دەدى مەحانيك ايەل.
ەرگە بەرگىسىز ەڭبەك ەتىپ جۇرگەن كەيىپكەرىمىز 5 بالادان 14 نەمەرە ءسۇيىپ وتىر. ءبىر قىزىعى، نۇرجامال وماروۆا كولىك جوندەۋدى بىلگەنىمەن ءوزى كولىك جۇرگىزە المايدى ەكەن.
ەسكە سالا كەتەيىك، بۇعان دەيىن ۇلتتىق ستاتيستيكا بيۋروسى بيىل اقپاندا ەلىمىزدە 149,2 مىڭ اۆتوكولىك قۇرالى ەسەپكە قويىلعانىن مالىمدەگەن بولاتىن.
