قىزىلوردادا جارتى عاسىردان بەرى كيىز ءۇي تىگەتىن وتباسى تۇرادى
قىزىلوردا. KAZINFORM - قىزىلوردا وبلىسىنىڭ ورتالىعىندا ءۇش بۋىندى الماستىرعان كيىز ءۇي تىگۋلى تۇر.
ايتىموۆتەر اۋلەتى ءۇشىن بۇل - تەڭدەسسىز قۇندىلىق. ويتكەنى جەتى قاناتتى اقبوز ءۇي وسى وتباسىنىڭ اۋلاسىندا جارتى عاسىردان بەرى جاراسىم تاۋىپ كەلەدى.
- ونى اكەم كەنجەباي ءايتىم ۇلى قاراقالپاق قولونەرشىلەرىنەن ساتىپ العان ەكەن. ۇيگە اكەلىپ تۇسىرگەنى، العاش رەت قۇرعانى، اعا- اپالارىمنىڭ جاپپاي كومەكتەسكەنى ءالى كوز الدىمدا. ءبىز كەشەگە دەيىن جالاعاش اۋدانىنىڭ اقارىق اۋىلىندا تۇردىق. 1975 -جىلى 1 - قىركۇيەك كۇنى ءبىرىنشى سىنىپقا وسى كيىز ۇيدەن شىققانمىن. ەكى جىل بۇرىن قىزىلوردا قالاسىنا قونىس اۋداردىق. كيىز ءۇيدى وزىمىزبەن بىرگە الا كەلدىك. جىلدا مامىر ايىنان باستاپ قۇراتىنبىز. بيىل بالالار «ناۋرىزدى كيىز ۇيدە قارسى الايىقشى» دەگەسىن كوكتەم شىعىسىمەن ورناتىپ قويدىق، - دەدى نۇرسۇلتان ءايتىموۆ
كەيىپكەرىمىز اكە-شەشەسى ومىردەن ءوتىپ كەتسە دە ەكەۋىنىڭ اماناتىنا سىزات تۇسىرمەي كەلەدى.
- اكەمنىڭ دۇنيەدەن وتەر الدىندا ايتقان ءبىر اۋىز ءسوزى سانامنان وشكەن جوق. «بىلەگىمنىڭ كۇشى قايتقانشا وسى قاراشاڭىراقتى قايدا جۇرسەم دە تىگۋدى وزىمە مىندەت ەتىپ العانمىن. قوعام بۇلاي تۇرا بەرمەيدى، ءبارى وزگەرەدى، اقشا اۋىسادى، سول كەزدە تارىقتىم دەپ ساتىپ جىبەرمەي، ەندىگى جەردە ءوزىڭ ەگە بول» دەپ تاپسىرعان ەدى. راس، ساتۋىمدى وتىنگەندەر بولدى. ءبىراق بۇل - اكەمنىڭ اماناتى، ودان اتتاپ كەتە المايمىن، - دەدى ول.
كيىز ءۇيدىڭ ديامەترى - 6,5 مەتر، بيىكتىگى - 4,20 مەتر. كەيبىر جابدىعىن نۇرسۇلتان اعانىڭ اناسى فاريدا رايىمقۇل قىزى توقىعان.
- ونى قۇرۋدىڭ ءوزى - ءبىز ءۇشىن كىشىگىرىم توي. قۇراتىن كەزدە اعا-جەڭگەلەرىم، ۇلدارىم مەن كەلىندەرىم، نەمەرەلەرىم جينالىپ اسارلاتادى. اكە- شەشەم بار كەزدەگى بالالىق، جاستىق شاعىم ەسىمە ءتۇسىپ، كوڭىلىم مارقايىپ قالادى. كيىز ءۇيدىڭ اۋاسى بولەك قوي، شىركىن! جانعا جايلى، ساپ- سالقىن، - دەدى نۇرسۇلتان ءايتىموۆ.
تاريحي كيىز ءۇي كوكتەمنەن قارا كۇز تۇسكەنشە، قازان ايىنا دەيىن قۇرىلىپ تۇرادى.
