قىزىلوردا وبلىسىندا ءبىر اۋىل الكوگول ءونىمىن ساتۋدان باس تارتتى
قىزىلوردا. KAZINFORM - قىزىلوردا وبلىسى ارال اۋدانىنداعى الكوگول ءونىم ساتۋدان باس تارتقان سازدى اۋىلىندا ەكى جىلدان بەرى بىردە-ءبىر قىلمىس تىركەلگەن جوق.
جەرگىلىكتى تۇرعىنداردىڭ ايتۋىنشا، اۋىلدا 2023-جىلدان باستاپ الكوگول ونىمدەرى ساتىلمايدى. ناتيجەسىندە سودان بەرى بىردە-ءبىر قىلمىس تىركەلمەگەن.
- اۋىلدا ەكى دۇكەن بار. ونىڭ ەشقايسىسىندا الكوگول ساتىلمايدى. ۋچاسكەلىك ينسپەكتور قىزمەتىن اتقارامىن. سوندىقتان العاشقى كەزەكتە اۋىل تۇرعىندارى جانە اقساقالدار، اۋىل اكىمشىلىگى، جەرگىلىكتى مەكتەپ وقۋشىلارى جانە ولاردىڭ اتا-انالارىمەن ءوزارا بايلانىس ورناتتىم. تۇرعىندار اراسىندا پروفيلاكتيكالىق شارالار ءجيى جۇرگىزىلەدى، - دەدى ۋچاسكەلىك پوليتسيا ينسپەكتورى، پوليتسيا كاپيتانى جەڭىسبەك تورەباي.
سونداي-اق ۋچاسكەلىك ينسپەكتور مەكتەپ قىزمەتكەرلەرىمەن دە تىعىز بايلانىس ورناتىپ، وقۋشىلارمەن، اتا-انالارمەن رەيدتەر ۇيىمداستىرىپ تۇرادى.
ەسكە سالساق، بۇدان بۇرىن قىزىلوردا وبلىسىندا 84 ەكولوگيالىق زاڭناما تالابىن بۇزۋ دەرەگى انىقتالدى.
