قىزىلوردا وبلىسىندا براكونەردەن 14 قاپ كيىك ەتى تاركىلەندى
قىزىلوردا. KAZINFORM - قىزىلوردادا پوليتسەيلەر «براكونەر» جەدەل- پروفيلاكتيكالىق ءىس- شاراسى بارىسىندا قۇقىق بۇزۋدىڭ 163 دەرەگىن انىقتادى، - دەپ حابارلايدى Polisia.kz.
1-28-اقپان كۇندەرى ارالىعىندا وبلىس كولەمىندە «براكونەر» جەدەل- پروفيلاكتيكالىق ءىس- شاراسى وتەدى. ءىس- شارانىڭ باستى ماقساتى - تابيعات قورعاۋ زاڭناماسىن بۇزۋشىلىقتاردى، بيولوگيالىق رەسۋرستار وبەكتىلەرى مەن ونىمدەرىنىڭ زاڭسىز اينالىمىن انىقتاۋعا جانە جولىن كەسۋگە، ەكولوگيالىق قىلمىستاردى اشۋعا باعىتتالعان.
جۇرگىزىلگەن رەيدتەر بارىسىندا پوليتسەيلەر 20 كۇندە تابيعات قورعاۋ زاڭنامالارىن بۇزۋشىلىقتىڭ 163 دەرەگىن انىقتادى. ونىڭ ىشىندە 6 قىلمىستىق ءىس جانە 157 اكىمشىلىك قۇقىق بۇزۋشىلىق بار. سونداي-اق جانۋارلار دۇنيەسىن پايدالانۋ تالاپتارىن جانە اڭ اۋلاۋ قاعيدالارىن بۇزۋدىڭ (ق ر ا ق ب ت ك- ءنىڭ 382-بابى) 136 دەرەگى انىقتالدى.
زاڭسىز بالىق اۋلاۋدىڭ (ق ر ا ق ب ت ك- ءنىڭ 383-بابى) -12، تىركەلمەگەن قارۋدى ساقتاۋدىڭ (ق ر ا ق ب ت ك- ءنىڭ 482-بابى) - 5 دەرەگى انىقتالىپ، اكىمشىلىك حاتتاما تولتىرىلدى.
مىسالى قازالى اۋدانىندا قىزىلوردا وبلىسى پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ روتا قىزمەتكەرلەرى جەدەل-الدىن الۋ ءىس-شاراسىن وتكىزۋ بارىسىندا Volkswagen اۆتوكولىگىن توقتاتتى.
تەكسەرۋ بارىسىندا اۆتوكولىكتەن 14 قاپقا سالىنعان كيىك ەتى انىقتالدى، ايعاق زات رەتىندە تاركىلەندى. تەرگەۋ ارەكەتتەرى باستالدى. ساراپتامالار تاعايىندالدى. كۇدىكتىگە قاتىستى سوت ءۇيقاماق تۇرىندەگى بۇلتارتپاۋ شاراسىنا سانكتسيا شىعاردى.
