قىزىلوردا تۇرمەسىندە سالەمدەمە اراسىنان كىر سابىنعا جاسىرىلعان تەلەفون تابىلدى
قىزىلوردا. KAZINFORM - قىزىلوردا وبلىسى بويىنشا قىلمىستىق اتقارۋ جۇيەسى دەپارتامەنتىنە قاراستى №37-تۇزەۋ مەكەمەسىندەگى جازاسىن وتەۋشىگە تانىسى ەرەكشە سالەمدەمە الىپ كەلگەن.
دەپارتامەنتتىڭ باسپا ءسوز قىزمەتى حابارلاعانداي، كۇدىكتى كىر سابىننىڭ ىشىنە تەلەفون جاسىرىپ وتكىزبەك بولعان.
- سالەمدەمەنى تەكسەرۋ ناتيجەسىندە مەكەمە قىزمەتكەرلەرى كىر سابىننىڭ ىشىنە جاسىرىلعان تەلەفوندى تاپتى. تەلەفون سوتتالعانداردىڭ پايدالانۋىنا تىيىم سالىنعان زاتتاردىڭ قاتارىنا جاتادى. ونى مەكەمە اۋماعىنا ەنگىزۋگە ارەكەتتەنگەن كۇدىكتەگى قاتىستى اكىمشىلىك قۇقىقبۇزۋشىلىق كودەكسىنىڭ 481-بابىنا سايكەس قۇجاتتار سوتقا دايىندالىپ جاتىر، - دەلىنگەن حابارلامادا.
بۇعان دەيىن ىشكى ىستەر ءمينيسترىنىڭ ورىنباسارى - قىلمىستىق اتقارۋ جۇيەسى كوميتەتىنىڭ ءتوراعاسى اباي قايىربەكوۆ قوستاناي وبلىسىندا ادۆوكاتتاردى تەرگەۋ يزولياتورىنا وتكىزەر كەزدە شالبارىن شەشكىزىپ تەكسەرەدى دەگەن مالىمدەمەگە تۇسىنىكتەمە بەرگەن بولاتىن.
