قىزىلشاعا قارسى ۆاكتسينا باسقا دا جۇقپالى اۋرۋلاردان قورعايدى-دارىگەر

بۇل تۋرالى الماتىداعى № 36 قالالىق ەمحانانىڭ ديرەكتورى گۇلجاينات تىلەگەن ايتتى، دەپ حابارلايدى Kazinform.

گۇلجاينات تىلەگەننىڭ ايتۋىنشا، قىزىلشامەن اۋىرعاندار بورتپە پايدا بولعانعا دەيىن ءتورت كۇن جانە ودان كەيىن ءتورت كۇن جۇقپالى بولادى. بۇل اۋرۋدىڭ تارالۋىن تەجەۋدى قيىنداتادى. قىزىلشا پنيەۆمونيا، ەنتسەفاليت، ءتىپتى ءولىم سياقتى اۋىر اسقىنۋعا اكەلۋى مۇمكىن.

ۆاكسيناتسيا-بالالاردى قىزىلشادان قورعاۋدىڭ ەڭ ءتيىمدى ءادىسى. ۆاكتسينا قاۋىپسىز ءارى ءتيىمدى جانە اۋرۋعا قارسى ۇزاق مەرزىمدى يممۋنيتەتتى قامتاماسىز ەتەدى.

«بالالاردى قىزىلشادان قورعاۋ ءۇشىن ولاردىڭ ۆاكتسيناتسيالانۋى وتە ماڭىزدى، ويتكەنى تەك ۆاكتسينا قىزىلشانىڭ ءورشۋ قاۋپىن ازايتىپ، ءومىردى ساقتاۋعا كومەكتەسەدى. ءبىرىنشى ەگۋ 12 ايلىق بالالارعا، ەكىنشىسى ولار 6 جاسقا تولعاندا جۇرگىزىلەدى. قىزىلشامەن اۋىراتىن ناۋقاستاردىڭ كوبەيۋىنە بايلانىستى قازاقستاندا قىزىلشا، قىزامىق جانە پاروتيتكە قارسى قوسىمشا جاپپاي يممۋنداۋ جۇرگىزىلىپ جاتىر. قازىر ءبىزدىڭ ەمحانادا 6 ايدان 10 اي 29 كۇنگە دەيىنگى بالالارعا ەگۋ جۇرگىزىلىپ جاتىر. كەلەسى ايدان (1-جەلتوقساننان) باستاپ 2 جاستان 4 جاس 11 اي 29 كۇنگە دەيىنگى بالالار ەگىلەدى. بۇل اۋرۋ جۇقتىرعان بالالاردىڭ %60 ىنىڭ جوسپارلى تۇردە ەكپە الماۋىنا، كوپ جاعدايدا اتا- انالارىنىڭ ەكپەدەن باس تارتۋىنا بايلانىستى»، - دەيدى دارىگەر.

قالالىق قوعامدىق دەنساۋلىق ساقتاۋ باسقارماسىنان ءمالىم ەتكەندەي، مەگاپوليستەگى ينفەكتسيالىق ستاتسيونارلار قىزىلشا اۋرۋىنىڭ ورشۋىنە بايلانىستى 90,3 پايىزعا تولدى.

مەگاپوليستە قىزىلشا جۇقتىرعان 1994 بالانىڭ 1880 ءى ەكپە الماعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى