قىزىل تەڭىزدە باسىپ الىنعان كەمەدە بەس ەلدىڭ ازاماتتارى بار
قىزىل تەڭىزدە يەمەندىك «انسار اللاح» بۇلىكشى- حۋسيتتەر قوزعالىسى Galaxy Leader كەمەسىن باسىپ الدى، ونىڭ وپەراتورى - جاپوندىق Nippon Yusen (NYK Line) كومپانياسى. Kazinform بۇل تۋرالى Kyodo اگەنتتىگىنە سىلتەمە جاساپ حابارلايدى.
بورتتا بولگاريا، مەكسيكا، رۋمىنيا، ۋكراينا مەن فيليپيننىڭ 25 ەكيپاج مۇشەسى بولعان. كوماندادا يزرايل مەن جاپونيا ازاماتتارى جوق.
كەمە ۇلى بريتانيالىق كومپانياعا تيەسىلى.
بۇعان دەيىن «انسار اللاح» وكىلى ياحيا ساريا مالىمدەمە جاساپ، قوزعالىس قىزىل تەڭىزدە يزرايلدىك كەمەنى باسىپ الىپ، ونى يەمەن جاعالاۋىنا اپارعانىن ايتتى.
ەكيپاج تۇتقىنعا الىندى. Marine Traffic قىزمەتىنىڭ دەرەگى بويىنشا، كەمە باگام ارالدارى دوستاستىعى تۋىن ءىلىپ ءجۇزىپ بارا جاتقان.
ول سوڭعى رەت 18-قاراشا 13:04 تە قايدا ەكەنى تۋرالى اقپارات بەردى.
سول ساتتە كەمە قىزىل تەڭىزدىڭ ورتالىق بولىگىندە بولاتىن. قازىر ونىڭ ترانسپوندەرى وشىرىلگەن.
يزرايل قورعانىس اسكەرى تۇركيادان ءۇندىستانعا بار جاتقان Galaxy Leader كەمەسىنىڭ يەۆرەي مەملەكەتىنە قاتىسى جوق ەكەنىن جانە ەكيپاج مۇشەلەرى قاتارىندا يزرايل ازاماتتارى بولماعانىن مالىمدەدى.
يزرايل پرەمەر- ءمينيسترى بينيامين نەتانياحۋ كەڭسەسىنىڭ مالىمدەمەسىنە سەنسەك، كەمە بريتاندىق كومپانياعا تيەسىلى، جاپون كومپانياسى باسقارادى.
بورتىندا 25 ەكيپاج مۇشەسى بولعان، ولاردىڭ اراسىندا يزرايل ازاماتتارى جوق.
كەڭسە «كەمەنى باسىپ العان - يران» دەپ ايىپتاپ وتىر.
جەكسەنبى كۇنى ساريا حۋسيتتەردىڭ قولى جەتەتىن اۋماققا ىلىككەن يزرايلدىك كەمەلەرگە شابۋىل جاسايمىز دەپ سەس كورسەتتى.
ول بارلىق ەلدى ەكيپاج قۇرامىنداعى ازاماتتارىن ەۆاكۋاتسيالاۋعا جانە يزرايل كەمە قاتىناسى كومپانيالارىنىڭ قىزمەتىنەن باس تارتۋعا شاقىردى.
سونىمەن قاتار قوزعالىس وكىلى قىزىل تەڭىزدەگى مۇنداي كەمەلەردەن اۋلاق بولۋدى ۇسىندى.
