قىز الىپ قاشقانى ءۇشىن 7 جىلعا سوتتالعان جىگىت جايلى تىڭ دەرەك شىقتى

ايىپتالۋشىنىڭ جاقىندارى جازانى تىم اۋىرلاتىپ جىبەردى دەپ وتىر. تارازدىق بويجەتكەن كەشىرىم بەرسە دە جازا جەڭىلدەمەپتى. سوندىقتان قايتا اپپەلياتسياعا ارىز بەرگەن.

ماڭعىستاۋلىق ازامات تارازدىڭ قىزىمەن وتكەن جىلى كوكتەمدە تانىسقان. كەزدەسىپ سويلەسە كەلە ۇيلەنۋ تۋرالى ۇسىنىس بىلدىرگەن. الايدا قىز قارسى بولىپ، تەلەفونىن كوتەرمەي بايلانىستى ۇزبەك بولعان. اقپان ايىندا جىگىت اقتوبەلىك دوسىن ەرتىپ كەلىپ، قىزدى كولىككە كۇشتەپ وتىرعىزادى. الىپ قاشۋ وپەراتسياسىن كورشىلەرى كورىپ، پوليتسيا شاقىرعان. ولار كوپ ۇزاماي قالانىڭ شىعا بەرىسىندە قولعا تۇسكەن.

قاماۋعا الىنعان قوس ازاماتتىڭ جانىنداعى جولداسى كوپبالالى اكە بولىپ شىقتى. ول ادام ۇرلاۋعا ەمەس، دوسى وتاۋ قۇرسىن دەگەن جاقسى نيەتپەن بارعانىن ايتادى. سوندىقتان 7 -جىل دەگەن جازا تىم اۋىر دەپ وتىر.

«دوسى قىزبەن كەزدەسىپ ءجۇرمىن، ءبىر داستارقاندا وتىرمىز دەگەن سوڭ، جامان نيەتپەن بارماعان. جىگىت قىزدى بۇرىن كورگەن، سويلەسكەن. 5 بالا اكەسىز جەتىم قالىپ وتىر. 7 جىل دەگەن تىم اۋىر. سوندىقتان جازاسىن جەڭىلدەتىپ بەرسە دەپ سۇرايمىن»، - دەيدى ايىپتالۋشىنىڭ ايەلى جانار جاننازاروۆا.

قىزدى الىپ قاشۋعا ەرىپ بارعان ازامات ءبىر وتباسىنىڭ جالعىز اسىراۋشىسى. ال زاڭ قاداعالاۋشى ورگان وكىلدەرى بۇل ەڭ تومەنگى جازا دەيدى.

«اتالعان تۇلعالار قىلمىستىق كودەكستىڭ 125-بابى 2-بولىگىمەن كىنالى دەپ تانىلىپ، ءارقايسى 7 جىل مەرزىمگە باس بوستاندىعىنان ايىرىلدى. بۇل ادام ۇرلاۋ دەرەگى بويىنشا ەڭ تومەنگى جازا. ەندى تۇپكىلىكتى شەشىمدى اپپەلياتسيالىق ساتى قابىلدايدى»، - دەيدى قالالىق پروكۋراتۋرانىڭ اعا پروكۋرورى اسىلان راقىمباي ۇلى.

قازىر قىزدىڭ ءوزى دە سوتقا ءوتىنىش ءتۇسىرىپتى. كەشىرىمىن بەرگەن، ءتىپتى نەكەلەسەتىنىن دە جەتكىزگەن.

سوت شەشىمى زاڭدى كۇشىنە ەنبەگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى