قىتايمەن ۆيزاسىز رەجيم قازاقستان تۋريزمىنە قالاي اسەر ەتەدى - ساراپشى پىكىرى

وسى ورايدا Kazakh Toursim ۇلتتىق كومپانياسىنىڭ باسقارۋشى ديرەكتورى دانيەل سەرجان ۇلى ۆيزالاردىڭ الىنۋى قازاقستان تۋريزمىنە قالاي اسەر ەتەتىنى جونىندە پىكىر ءبىلدىردى، دەپ حابارلايدى Kazinform اگەنتتىگى.

«قىتاي - قازاقستان ءۇشىن ەڭ باسىم تۋريستىك نارىقتاردىڭ ءبىرى. سەبەبى بۇل بىزگە كورشىلەس مەملەكەت، ەكى ەل اراسىندا ءبىرشاما اۋە رەيستەرى بار. ناقتى سيفرلارمەن ايتار بولساق، 2019 -جىلى بىزدە قىتايدان كەلگەن 90 مىڭعا جۋىق تۋريست تىركەلگەن. ال بيىلعى 10 ايدىڭ ىشىندە 85 مىڭعا جۋىق تۋريست كەلدى، ياعني جىل اياعىنا دەيىن پاندەمياعا دەيىنگى كورسەتكىشتەن دە اسىپ تۇسەمىز دەگەن بولجام بار»، - دەدى د. سەرجان ۇلى اگەنتتىك تىلشىسىنە بەرگەن سۇحباتىندا.

قازاقستان مەن قىتاي قالالارى اراسىندا 6 باعىت بويىنشا بەس اۋە كومپانياسى اپتاسىنا 20 شاقتى رەيس جاسايدى. كوبىنەسە بۇل رەيستەر بەيجىڭ قالاسىنان استانا مەن الماتىعا، وعان قوسا، ءۇرىمجى، سيان قالاسىنان ۇشادى. بۇل باعىتتار ءارى قاراي كەڭەيە تۇسەدى دەگەن بولجام بار.

وتكەن جىلمەن سالىستىرعاندا قىتايدان قازاقستانعا كەلگەن تۋريستەر سانى ەكى ەسەگە ارتقان. 2022 -جىلى قازاقستاننىڭ قوناق ۇيلەرىندە شامامەن 45 مىڭ قىتايلىق تۋريست توقتاعان. ولاردان تۇسكەن پايدانىڭ جالپى كولەمى 16 ميلليون دوللارعا جۋىقتايدى. بۇل 2021 -جىلمەن سالىستىرعاندا ەكى ەسە ارتىق.

«بيىل دا تۋريستەر سانى ارتاتىنىن ەسكەرسەك، پايدا دا ەسەلەپ كوبەيەدى دەگەن ءسوز. Kazakh Toursim كومپانياسى ۇسىنعان «ە- قوناق» جۇيەسى شەتەلدىك تۋريستەر اعىنىن ەسەپتەپ وتىرادى. سول بويىنشا بۇگىنگى كۇنگە دەيىن ميلليوننان استام تۋريستەر سانىن بايقادىق، سونىڭ ىشىندە توپ-3 قاتارىندا قىتاي نارىعى دا بار. كوپ جاعدايدا قىتايلىق تۋريستەر الماتى قالاسى مەن الماتى ماڭىنداعى تۋريستىك ورىندارعا كەلەدى. الماتى - تەك قانا قىتاي نارىعىندا ەمەس، جالپى شەتەلدىك تۋريستەر اراسىنداعى كوشباسشى باعىت. قىتاي تۋريستەرى تەك قانا قالالارعا ەمەس، تابيعي ورىندار مەن ۇلتتىق پاركتەرگە ءجيى بارادى. اسىرەسە ىلە الاتاۋى، شارىن، شىمبۇلاق سەكىلدى ورىنداردى ءجيى تاڭدايدى»، - دەيدى كومپانيا وكىلى.

ونىڭ ايتۋىنشا، Kazakh Toursim كومپانياسىنىڭ شەتەلدىك تۋريستەردى تارتۋداعى نەگىزگى ءرولى - ماركەتينگ، ياعني جارناما جاساۋ.

«بىزگە قىتاي نارىعى بيىلدان باستاپ قايتا اشىلدى، بۇدان باسقا قازاقستان - قىتايلىق تۋريستەر ءۇشىن توپپەن ساياحاتتاۋعا رۇقسات ەتىلگەن 20 باعىتتىڭ اراسىنا كىردى. وسىنىڭ ارقاسىندا ءبىز كوپتەگەن جارناما جۇرگىزدىك، ەڭ ماڭىزدىسى - قىتايداعى ەڭ ۇلكەن ونلاين تۋريستىك اگەنتتىك پلاتفورماسىندا جارناما ناۋقانىن جۇرگىزدىك، قىتايلىق بلوگەرلەردى تارتىپ، جالپى 50 ميلليون ادام اۋديتوريانى قامتىدىق. كەلەسى جىل - «قىتايداعى قازاقستان ءتۋريزمى جىلى» دەپ اتالعان. وسىنىڭ اياسىندا ناۋرىز ايىنان باستاپ جىلدىڭ اشىلۋىن وتكىزىپ، ۇلكەن كورمەلەر ۇيىمداستىرامىز. قازاقستاندىق تۋريستىك كومپانيالاردى، تۋريزمدە جۇمىس ىستەيتىن وكىلدەردى قىتايدا وتەتىن ۇلكەن تۋريستىك شارالارعا اپارامىز، جەرگىلىكتى تۋريستىك بيزنەسپەن تانىستىرۋ ءۇشىن كەزدەسۋلەر وتكىزۋدى جوسپارلاپ وتىرمىز. بۇدان بولەك، قىتايلىق ۇلكەن تۋريستىك كومپانيالاردى، ميلليونداعان اۋديتورياسى بار قىتايلىق بلوگەرلەردى، مەديا رەسۋرستارىن ەلگە شاقىرىپ، تۋريستىك الەۋەتىمىزدى كورسەتۋ جوسپارلانعان. باسقا دا مەملەكەتتىك ورگاندارمەن بىرگە، قىتايلىق تۋريستەرگە جاعداي جاساۋ، سولاردىڭ تىلدەرىندە اقپارات دايىنداۋ، ولاردىڭ تىلدەرىندە ءتۇرلى نۇسقاۋلىقتار ازىرلەۋ جۇمىستارى ءجۇرىپ جاتىر»، - دەدى دانيەل سەرجان ۇلى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى