قىتايلىق ۆولونتەر: ديماش ارقىلى قازاقستان تۋرالى ءبىلدىم
يابۋلي. KAZINFORM - قىتايدا ءوتىپ جاتقان Ⅸ قىسقى ازيا ويىندارىنىڭ ۆولونتەرى قازاقستاندىقتارعا ساتتىلىك تىلەدى.
قىسقى ازيادانىڭ شاڭعىمەن سىرعاناۋ جارىسىندا مەديا قىزمەتكەرلەرىنە كومەك كورسەتەتىن ۆولونتەر شى جينفان Kazinform تىلشىسىنە قازاقستان تۋرالى ديماش قۇدايبەرگەن ارقىلى بىلەتىنىن ايتتى.
- مەن قىتايدىڭ حۋنان پروۆينتسياسىنان كەلدىم، ەكىنشى كۋرس ستۋدەنتىمىن. قازاقستان تۋرالى ەڭ العاش ديماش ارقىلى ءبىلدىم. ءوزىمدى ديماشتىڭ جانكۇيەرى دەپ سانايمىن، - دەدى ول.
قىتايلىق ۆولونتەر اڭگىمە بارىسىندا قازاقستاندىق سپورتشىلارعا ساتتىلىك تىلەدى.
- حاربينگە قوش كەلدىڭىزدەر! قازاقستان سپورتشىلارىنا قىسقى ازيا ويىندارىندا ساتتىلىك تىلەيمىن، - دەدى شى جينفان.
ايتا كەتەيىك، بۇگىن شاڭعى سپورتىنان قازاقستان ەرلەر جانە ايەلدەر قۇراماسى كوماندالىق ەستافەتادان جارىس جولىنا شىعىپ، ءبىر كۇمىس جانە ءبىر قولا مەدال جەڭىپ الدى.
قازاقستان قۇراماسىنا قولداۋ ءبىلدىرۋ ءۇشىن ۇلتتىق وليمپيادا كوميتەتىنىڭ ءتوراعاسى گەننادي گولوۆكين، تۋريزم جانە سپورت ءمينيسترى ەربول مىرزابوسىنوۆ يابۋليگە كەلدى.
سونىمەن قاتار، گولوۆكين مەن مىرزابوسىنوۆ جۇلدە العان قازاقستاندىق سپورتشىلاردى قۇتتىقتادى.
اۆتور
مۇحتار قاليموللا ۇلى
