قىتايلىق قانداسىمىز قىسقى ازيا ويىندارىندا قولا جۇلدە جەڭىپ الدى
حاربين. KAZINFORM - قىتايدا تۋىپ-وسكەن ۇلتى قازاق سپورتشى سامعار سەرىك ۇلى IX قىسقى ازيا ويىندارىنىڭ جۇلدەگەرى اتاندى.
قانداسىمىز ەرلەر اراسىندا شاڭعىمەن سىرعاناۋدان سپرينت باعدارلاماسىندا ونەر كورسەتىپ، 2 مينۋت 58.51 سەكۋند ناتيجەمەن قولا مەدال ەنشىلەدى.
ايتا كەتەرلىگى، ءدال وسى سىندا قازاقستاندىق كونستانتين بورتسوۆ كۇمىس ەنشىلەگەن بولاتىن. سپورتشىلار مارە سىزىعىن ءۇشىنشى جانە ءتورتىنشى بولىپ كەسكەنىمەن، ەكىنشى ورىن العان جاپوندىق سپورتشى ەرەجە بۇزۋىنا بايلانىستى ناتيجەسى جويىلدى.
سول سەبەپتى، كونستانتين بورتسوۆ كۇمىس السا، قانداسىمىز سامعار سەرىك ۇلى قولا جۇلدەگەر اتاندى.
سامعار سەرىك ۇلى 2005 -جىلى 10-قاڭتار قىتايدىڭ سولتۇستىك- باتىسىنداعى شىڭجاڭ ۇيعىر اۆتونوميالىق ولكەسى التاي ايماعى التاي قالاسىندا دۇنيەگە كەلگەن. ول 2023 -جىلى ەل چەمپيوناتىندا كوزگە ءتۇسىپ، 2024 -جىلى شىڭجاڭ قۇراماسى ساپىندا قىتاي قىسقى سپورت سپارتاكياداسىنىڭ چەمپيونى اتانعان.
بۇعان دەيىن حابارلاعانىمىزداي، قىتاي قۇراماسىنىڭ ساپىندا ۇلتى قازاق 4 سپورتشى IX قىسقى ازيا ويىندارىنا قاتىسىپ جاتىر. ولار: اقنار اداق قىزى (كونكيمەن جۇگىرۋ)، قاناعات مۇحامەد ۇلى (كونكيمەن جۇگىرۋ)، بايان جالىن قىزى (شاڭعى) جانە سامعار سەرىك ۇلى (شاڭعى).
مۇحتار قاليموللا ۇلى
