قىتايلىق ب ا ق: قازاقستان ورناتقان رەكوردتى قايتالادىق

قىتايدىڭ باس گازەتى - «جەنمين جيباو» - نىڭ («حالىق گازەتى») اقپاراتتىق پورتالى ءدۇبىرلى دودانىڭ سوڭعى كۇنى قىتاي قۇراماسىنىڭ تاعى ءبىر التىندى ەنشىلەپ، جالپى التىن مەدال سانىن 32 گە جەتكىزگەنىن، وسىلايشا قازاقستان قۇراماسىنىڭ قىسقى ازيا ويىندارىنداعى رەكوردتىق كورسەتكىشىمەن تەڭەسكەنىن اتاپ ءوتتى.

- اق ازيادا اياقتالدى. قىتاي قۇراماسى جالپى 32 التىن، 27 كۇمىس جانە 26 قولا مەدال جەڭىپ الىپ، قىسقى ازيا ويىندارى بويىنشا ءوز تاريحىنداعى ەڭ ۇزدىك ناتيجەگە قول جەتكىزدى، - دەپ جازادى باسىلىم.

«تسيلۋ اقشامى» باسىلىمى كەزەكتى اق ازيدا جابىلعانعا دەيىن ءبىر ويىندا جەڭىپ العان التىن مەدال مەن جالپى مەدال سانى بويىنشا رەكوردتىق كورسەتكىش قازاقستان قۇراماسىنا تيەسىلى بولىپ كەلگەنىن ەسكە الىپتى.

- 2011-جىلى استانا جانە الماتى قالالارىندا وتكەن قىسقى ازيا ويىندارىندا قازاقستان قۇراماسى 32 التىن، 21 كۇمىس، 17 قولا - جالپى 70 مەدال جەڭىپ الىپ، التىن مەدال مەن جالپى مەدال سانى بويىنشا جاڭا رەكورد ورناتقان ەدى. بۇل جولى حاربين قالاسىندا قىتاي قۇراماسى جالپى 85 مەدال الىپ، مەدالدار سانى بويىنشا جاڭا رەكورد ورناتتى. ەگەر بۇگىن (14-اقپان) كەرلينگتەن قىتاي ايەلدەر كومانداسى التىن مەدالدان قاپىدا ايىرىلىپ قالماعاندا، قىتاي قۇراماسى ءبىر ويىندا ولجالانعان التىن مەدال سانى بويىنشا قازاقستان ورناتقان رەكوردتى جاڭارتىپ، جاڭا بيىكتى باعىندىرار ەدى، - دەپ جازادى «تسيلۋ اقشامى».

قىتاي وليمپيادا كوميتەتى ءتوراعاسىنىڭ ورىنباسارى چجوۋ تسيان «قىتاي سپورتى» گازەتىنە بەرگەن سۇحباتىندا حاربيندە وتكەن دودادا قىتاي قۇراماسىنىڭ تاريحي جەڭىسكە جەتكەنىن اتاپ ءوتتى.

- بيىلعى قىسقى ازيا ويىندارىنا قىتايدان 170 سپورتشى قاتىسىپ، قىسقى سپورتتىڭ 6 نەگىزگى، 11 قوسالقى جانە 64 كىشى تۇرىندە باق سىنادى. ويىن قورىتىندىسى بويىنشا قىتاي قۇراماسى جالپى 85 مەدال جەڭىپ الىپ، التىن مەدال مەن جالپى مەدال سانى بويىنشا كوش باستادى. بۇل — قىسقى ازيا ويىندارىنىڭ تاريحىنداعى قىتايدىڭ ەڭ جاقسى كورسەتكىشى. اۋىز تولتىرىپ ايتارلىعى، سپورتشىلارىمىز 2011 -جىلى قازاقستان قۇراماسىنىڭ ءبىر ويىندا 32 التىن مەدال العان تاريحي رەكوردىن قايتالاپ، ولاردىڭ جالپى مەدال سانى بويىنشا (70 مەدال) رەكوردىن جاڭارتتى. وسىلايشا قىتاي قۇراماسى ءۇش مارتە قىسقى ازيا ويىندارىنان كەيىن التىن جانە جالپى مەدال سانى بويىنشا قايتادان ءبىرىنشى ورىنعا كوتەرىلدى، - دەيدى چجوۋ تسيان.

The Paper اقپاراتتىق پورتالى جارىستىڭ سوڭعى كۇنى قىتاي قۇراماسىنىڭ 32-التىندى جەڭىپ الىپ، 2011-جىلى قازاقستان قۇراماسى ورناتقان رەكوردتىق كورسەتكىشتى قايتالاعانىن جازىپتى. قىتايدىڭ دەنە شىنىقتىرۋ جانە سپورت جونىندەگى مەملەكەتتىك باس باسقارماسى قىسقى سپورت ورتالىعىنىڭ ديرەكتورى ۆان لەيدىڭ پىكىرىنشە، قىتاي قۇراماسىنىڭ كەزەكتى قىسقى ازيا ويىندارىندا التىن جانە جالپى مەدال سانى بويىنشا تاريحي جەتىستىككە قول جەتكىزۋى «بىلىكتى ماماندار دايارلاۋ» جانە «سپورتتىڭ ءالسىز تۇرلەرىن نىعايتۋ» ستراتەگياسىنىڭ ارقاسىندا مۇمكىن بولىپ وتىر.

- ءبىزدىڭ دەلەگاتسيا ەلدىڭ ءار ايماعىنان شىققان سپورتشىلاردان جاساقتالدى. ءداستۇرلى سولتۇستىك ايماقتارمەن عانا شەكتەلمەي، وزگە دە 20 پروۆينتسيا مەن مەگاپوليستەن سپورتشىلار دايىندادىق. ولاردىڭ قاتارىندا 9 ەتنيكالىق ازشىلىقتىڭ 26 وكىلى دە بار. بۇل رەتتە قىتاي قۇراماسىنداعى سپورتشىلاردىڭ ورتاشا جاسى 23 تە. ولاردىڭ قاتارىندا قيىندىققا مۇقالمايتىن تاجىريبەلى سپورتشىلار دا، جارقىراپ كوزگە ءتۇسىپ كەلە جاتقان جاڭا جۇلدىزدار دا بار. شىنىمەن دە ناعىز ۇزدىكتەردى سارالاپ، بار كۇشىمىزدى سالدىق دەسەك، ارتىق ايتقان بولمايمىز، - دەيدى ول.

اۆتور ەرلان مازان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى