قىتايلار اي مەن استەرويدتاردان پايدالى قازبالار قازادى
استانا. قازاقپارات - قىتاي عالىمدارى روبوت كەنشى جاسادى. بۇل قۇرىلعى عارىشتان كەن ىزدەيدى، قازبا جۇمىستارىن جۇرگىزەدى. اي مەن مارس جانە جەردىڭ توڭىرەگىندەگى استەرويدتاردى زەرتتەيدى.
قۇرىلعى بەدەرى ويلى-قىرلى اسپان دەنەلەرىنىڭ بەتىندە ەركىن قوزعالا الادى. ەرەكشەلىگى 250 گرادۋس تەمپەراتۋرا مەن ميكروگراۆيتاتسيالى ورتادا جۇمىس ىستەي بەرەدى. جوبا اۆتورلارى ونى عارىش كەڭىستىگىنە بارىنشا جاقىنداتىلعان زەرتحانادا العاشقى سىناقتان وتكىزدى. الايدا ينجەنەرلەر تارتىلىس كۇشىنىڭ تومەندىگىنە بايلانىستى ءبىرقاتار قيىندىقتارعا تاپ بولعان.
ليۋ سينحۋا، قىتايدىڭ تاۋ ءىسى جانە تەحنولوگيالار ۋنيۆەرسيتەتىنىڭ پروفەسسورى:
- ەڭ قيىنى، بۇرعىلاۋ جۇمىستارىن جۇرگىزۋ بولدى. گراۆيتاتسيا جوق كەڭىستىكتە سالماق كومەكتەسپەيدى. ونىڭ ۇستىنە اي توپىراعى بورپىلداق كەلەدى. روبوت قالىپتى جاعدايدا تۇرا المايدى. بۇرعى قوزعالىپ كەتە بەرەدى. بۇل ماسەلەنىڭ شەشىمىن جاندىكتەردەن تاپتىق. سولاردىڭ تىرناق قۇرىلىمىنا ۇقساس ەتىپ 6 اياق جاسادىق. ول جاناسىپ، قابىسۋىن كۇشەيتۋگە مۇمكىندىك بەردى.
24.kz
