قىتايدىڭ ورتالىق ازيا ەلدەرىمەن ساۋداسىنىڭ جارتىسى قازاقستانعا تيەسىلى - پرەزيدەنت
قازاقستان پرەزيدەنتى قاسىم- جومارت توقايەۆ بەيجىڭگە رەسمي ساپارى اياسىندا بۇكىل قىتايلىق حالىق وكىلدەرى جينالىسى تۇراقتى كوميتەتىنىڭ ءتوراعاسى جاۋ لىجيمەن كەزدەسۋ وتكىزدى. kazinform بۇل تۋرالى اقورداعا سىلتەمە جاساپ حابارلايدى.
كەزدەسۋ بارىسىندا قاسىم- جومارت توقايەۆ عاسىرلار بويعى دوستىق پەن ءوزارا قولداۋدىڭ بەرىك ارقاۋىنا سۇيەنە وتىرىپ، قازاقستان مەن قىتاي ماڭگىلىك ءارى جان- جاقتى ستراتەگيالىق سەرىكتەستىك رۋحىندا تۇراقتى نىعايىپ كەلە جاتقان ۇلگىلى مەملەكەتارالىق ىنتىماقتاستىقتىڭ نەگىزىن قالاعانىن اتاپ ءوتتى.
«ەكى ەل اراسىندا بەلسەندى ءارى سەنىمدى ساياسي ديالوگ ورناعان. ۇكىمەتتەر مەن پارلامەنتتەر دەڭگەيىندە جۇيەلى جۇمىس جۇرگىزىلىپ جاتىر. بىلتىر ەلدەرىمىز اراسىنداعى ىنتىماقتاستىقتىڭ جاڭا «التىن 30 -جىلدىعىنا» قادام باستىق. بۇگىن ءتوراعا شي جينپيڭمەن جانە مەملەكەتتىك كەڭەستىڭ پرەمەرى لي جياڭمەن جان- جاقتى كەلىسسوزدەر جۇرگىزۋ بارىسىندا ءوزارا ءتيىمدى ىنتىماقتاستىقتى كۇشەيتۋگە نيەتتى ەكەنىمىزدى راستادىق. قازىرگى تاڭدا قىتايدى قازاقستاننىڭ ەڭ باستى ساۋدا سەرىكتەستەرىنىڭ جانە ءبىزدىڭ ەكونوميكامىزدىڭ ءىرى ينۆەستورلارىنىڭ ءبىرى دەۋگە بولادى. ءبىز ەلدەرىمىز اراسىنداعى تاۋار اينالىمىن الداعى ۋاقىتتا 40 ميلليارد دوللارعا دەيىن جەتكىزۋدى كوزدەپ وتىرمىز. جالپى قىتايدىڭ ورتالىق ازيا مەملەكەتتەرىمەن تاۋار اينالىمىنىڭ جارتىسى قازاقستانعا تيەسىلى»، - دەدى پرەزيدەنت.
ءوز كەزەگىندە جاۋ لجي قاسىم- جومارت توقايەۆقا ءىلتيپات بىلدىرە وتىرىپ، قازاق- قىتاي قاتىناستارىنىڭ قارقىندى دامىپ كەلە جاتقانىن اتاپ ءوتتى. ونىڭ ايتۋىنشا، قازاقستان پرەزيدەنتىنىڭ ساپارى بارىسىندا قىتاي تاراپىمەن تابىستى كەلىسسوزدەر جۇرگىزىلدى. سونىمەن قاتار بۇكىل قىتايلىق حالىق وكىلدەرى جينالىسى تۇراقتى كوميتەتىنىڭ ءتوراعاسى ەكى ەل اراسىنداعى ستراتەگيالىق سەرىكتەستىك ودان ءارى بەكيدى، ءوزارا ءتيىمدى ىنتىماقتاستىق داميدى جانە ەكىجاقتى قاتىناستار جاڭا دەڭگەيگە كوتەرىلەدى دەپ سەنىم ءبىلدىردى.
قاسىم- جومارت توقايەۆ پەن جاۋ لىجي قازاقستان مەن قىتايدىڭ پارلامەنتارالىق قاتىناسىنىڭ جوسپارلى تۇردە نىعايۋىن وڭ باعالادى، سونداي- اق كەڭ كولەمدەگى ەكىجاقتى ىنتىماقتاستىقتىڭ تابىستى دامىپ كەلە جاتقانىن اتاپ ءوتتى.
