قىتايدىڭ ءبىرقاتار ايماعىندا توتەنشە جاعداي جاريالاندى
استانا. KAZINFORM - قىتايدىڭ توتەنشە جاعدايلار مينيسترلىگى سەيسەنبى كۇنى انحوي، حەنان جانە حۋبەي پروۆينتسيالارىنداعى تومەن تەمپەراتۋرا مەن قاردىڭ مول تۇسۋىنە بايلانىستى 4-دەڭگەيدەگى توتەنشە جاعداي رەجيمىن ىسكە قوستى، دەپ حابارلايدى شينحۋا اقپارات اگەنتتىگى.
تابيعي اپاتتاردىڭ الدىن الۋ، ازايتۋ جانە باقىلاۋ جونىندەگى مەملەكەتتىك كوميتەت اپاتتىڭ الدىن الۋ جانە توتەنشە جاعدايلاردى جويۋ جۇمىستارىنا كومەكتەسۋ ءۇشىن ءۇش پروۆينتسياعا جۇمىس توپتارىن جىبەردى، دەپ حابارلادى مينيسترلىك.
«كوكتەم مەرەكەسىنەن كەيىن جولاۋشىلار تاسىمالى كوپ بولاتىنىن ەسكەرە وتىرىپ، ءبىرقاتار ايماقتارعا ايازدى جاڭبىر مەن قار جاۋادى دەپ كۇتىلۋدە، تابيعي اپاتتاردىڭ قاۋپى سالىستىرمالى تۇردە جوعارى»، - دەپ حابارلادى ۆەدومستۆودان.
مينيسترلىك ءتيىستى اۋدانداردا اۋا رايىنىڭ وزگەرۋىنە ءجىتى نازار اۋدارۋدى، ءتۇرلى ۆەدومستۆولار اراسىنداعى ۇيلەستىرۋدى كۇشەيتۋدى، توتەنشە جاعدايلاردى جويۋ كۇشتەرىن كۇشەيتۋدى جانە تابيعي اپاتتاردى جويۋعا الدىن الا دايىندالۋدى تالاپ ەتتى.
ورتالىق مەتەورولوگيالىق ستانتسيا سول كۇنى قارلى بورانعا بايلانىستى سارى ەسكەرتۋ جاريالادى. بولجامعا سايكەس، سەيسەنبىدەن جۇماعا دەيىن ەلدىڭ كەي ايماقتارىندا جاڭبىر، بۇرشاق جاۋۋى مۇمكىن.
