قىتايدان اۋعانستانعا شىققان پويىز قازاقستان ارقىلى بارادى
استانا. KAZINFORM - قىتاي حالىق رەسپۋبليكاسى مەن اۋعانستان يسلام رەسپۋبليكاسى اراسىندا جۇك تاسىمالى ءۇشىن جاڭا تەمىرجول مارشرۋتى ۇيىمداستىرىلدى.
- مارشرۋت ق ح ر، قازاقستان، وزبەكستان جانە اۋعانستان ارقىلى وتەدى. جۇك قۇرامدارى قىتاي شەكاراسىن قورعاس باقىلاۋ- وتكىزۋ پۋنكتى ارقىلى كەسىپ ءوتىپ، قازاقستان رەسپۋبليكاسىنىڭ اۋماعى (التىنكول ستانتسياسى) ارقىلى، سودان كەيىن وزبەكستان رەسپۋبليكاسى (گالابا ستانتسياسى) ارقىلى ءوتىپ، سوڭعى مەجەلى پۋنكتكە - حايراتون قالاسىنا (اۋعانستان) شامامەن 12-15 كۇندە جەتەدى، - دەلىنگەن ق ت ج حابارلاماسىندا.
وسى باعىت بويىنشا العاشقى پويىز تۋانتسزەتسۋن ستانتسياسىنان (چۋڭشين قالاسى، ق ح ر) جولعا شىقتى. قۇرامىنا تەلەكوممۋنيكاتسيالىق جابدىقتارى بار 55 كونتەينەر كىرەدى.
بۇل باعىتتىڭ اشىلۋى قازاقستاننىڭ ستراتەگيالىق ترانزيتتىك حاب رەتىندەگى باستى ءرولىن نىعايتادى.
ەسكە سالساق تەمىرجول ارقىلى جۇك تاسىمالىن ارتتىرۋ بويىنشا 4 ءىرى جوبا جاسالىپ جاتقانى تۋرالى جازعان ەدىك.
