قىتايداعى قازاقستان تۋريزمى جىلى: قازاقستاندىق العاشقى دەلەگاتسيا بۇگىن بەيجىڭگە باردى
بەيجىڭ. KAZINFORM - الداعى 28-29-ناۋرىز كۇندەرى قىتاي حالىق رەسپۋبليكاسىنىڭ استاناسى بەيجىڭ قالاسىندا قازاقستان ءتۋريزمى جىلىنىڭ رەسمي اشىلۋ ءراسىمى وتەدى.
وسىعان وراي قازاقستاننان شىققان العاشقى دەلەگاتسيا مۇشەلەرى بۇگىن بەيجىڭگە ارنايى ۇشىپ كەلدى. ولاردىڭ قاتارىندا بيلىك وكىلدەرىنەن بولەك، انشىلەر، كۇيشىلەر، بيشىلەر، سونىمەن قاتار الەمدىك ارەنادا ەل نامىسىن ابىرويمەن قورعاپ جۇرگەن تانىمال سپورتشىلارىمىز دا بار.
ايتا كەتسەك، وتكەن جىلى پرەزيدەنت قاسىم-جومارت توقايەۆ «ءبىر بەلدەۋ، ءبىر جول» حالىقارالىق ىنتىماقتاستىعىنىڭ III فورۋمىنا قاتىسۋعا قازان ايىندا بەيجىڭگە بارعان بولاتىن. فورۋم اياسىندا ەكى ەل باسشىلارى كەلىسسوز وتكىزىپ، ءبىرقاتار قۇجاتقا قول قويدى. وسى كەزدەسۋدە 2024 -جىل - قىتايداعى قازاقستان تۋريزمى جىلى بولىپ جاريالانعان ەدى.
وسىعان وراي ق ر تۋريزم جانە سپورت ءمينيسترى ەرمەك مارجىقپايەۆ قىتايدىڭ ءىرى قالالارىندا ءبىرقاتار ماڭىزدى ءىس-شارالاردى وتكىزۋ تۇجىرىمداماسىن ۇسىنىپ، ەلىمىزدىڭ قىتايداعى تۋريزم جىلىنا بايلانىستى اۋقىمدى ءىس- شارالاردى وتكىزۋدى قولىنا الدى. اتاپ ايتساق، قىتاي حالىق رەسپۋبليكاسىنىڭ مادەنيەت جانە تۋريزم ءمينيسترى سۋن ەليمەن كەزدەسىپ، قىتايداعى قازاقستان تۋريزمى جىلىن وتكىزۋ جوسپارلارىن جانە تۋريزم سالاسىنداعى ءوزارا ىنتىماقتاستىق ودان ءارى دامىتۋ ماسەلەلەرىن تالقىلاعان بولاتىن.
«قىتاي قازاقستان ءۇشىن باسىم تۋريستىك نارىق پەن ماڭىزدى سەرىكتەستەردىڭ ءبىرى سانالادى. ويتكەنى ەكى ەلدىڭ گەوگرافيالىق ورنالاسۋى، جىبەك جولى بويىنداعى تاريحى تەرەڭ بايلانىسى بارلىق سالادا ءوزارا ىقپالداستىققا وڭ اسەرىن تيگىزەدى. بۇگىنگى تاڭدا ەلدەرىمىز اراسىنداعى تۋريستىك اعىنى پاندەمياعا دەيىنگى كورسەتكىشكە قايتا كوتەرىلىپ وتىر»، - دەپ اتاپ وتكەن ەدى ەرمەك مارجىقپايەۆ.
ماسەلەن، قىتاي تۋريستەرى بىلتىر قازاقستانعا ەڭ كوپ كەلگەن توپ-5 ەلدىڭ قاتارىنا ەندى. ستاتيستيكا دەرەكتەرى بويىنشا، وتكەن جىلدىڭ 9 ايىندا قازاقستاندا 75 مىڭنان استام قىتايلىق تۋريستكە قىزمەت كورسەتىلگەن. ال قىتايدان قازاقستانعا كەلۋشىلەردىڭ جالپى سانى 200 مىڭ ادامنان استى.
ۆەدومستۆو باسشىسى بىلتىر ەكى ەل اراسىندا ۆيزاسىز رەجيم ەنگىزىلگەنىن جانە بيىل تىكەلەي رەيستەر سانىن اپتاسىنا 30 عا دەيىن ۇلعايتۋ جوسپارىن ەسكەرە وتىرىپ، تۋريستىك اعىننىڭ ودان ءارى ارتۋى مۇمكىن ەكەنىن اتاپ ءوتتى. ءمينيستردىڭ مالىمدەۋىنشە، بيىل قىتايدىڭ 7 ءىرى قالاسىندا (بەيجىڭ، شيان، شانحاي، ءۇرىمجى، گونكونگ، حاڭجوۋ، چىڭدۋ) توپ-20 وتاندىق تۋريستىك ورىندار تانىستىرىلادى.
اۆتور
كۇنسۇلتان وتارباي
