قىتايداعى قازاق كونكيشىسى ءوز ەسىمىنىڭ ماعىناسىن ءتۇسىندىردى
استانا. KAZINFORM – كونكيمەن جۇگىرۋدەن ازيا ويىندارىنىڭ چەمپيونى اتانعان قىتايداعى قازاق سپورتشىسى اقنار ارداق قىزى جانكۇيەرلەرىنە ءوز ەسىمىنىڭ ءمان-ماعىناسىن ءتۇسىندىردى.
ەسكە سالايىق، اقنار حاربيندە ءوتىپ جاتقان قىسقى ازيا ويىندارىندا كونكيمەن جۇگىرۋدەن كوماندالىق سايىستا قىتاي قۇراماسىمەن بىرگە التىن جۇلدە جەڭىپ الدى.
«مەنىڭ قىسقى ازيا ويىندارىنا ساپارىم ءساتتى اياقتالدى. ءبىزدىڭ قىتاي قۇراماسى كونكيمەن جۇگىرۋدەن التىن جۇلدەنى جەڭىپ الدى. كوماندالاستارىممەن بىرگە ەلىمىزدىڭ داڭقىن الىپ جۇرگەنىمدى ماقتان تۇتامىن.
جاتتىقتىرۋشىلارعا جانە تورەشىلەرگە ادالدىعى ءۇشىن، سونداي-اق مەنى ءارقاشان قولداعان وتباسىم مەن دوستارىما راحمەت. بۇل التىن مەدال - الداعى ۋاقىتتا بۇدان دا جاقسى ناتيجەگە جەتۋىمە موتيۆاتسيا. ميلان وليمپياداسىندا دا وسى ءساتتى كۇتەمىز.
ءسوز سوڭىندا ايتا كەتەيىن دەگەنىم، حاربين قالاسىنا العىسىمدى بىلدىرگىم كەلەدى. مەنىڭ ەسىمىمدەگى «اق» قازاق تىلىندە كىرشىكسىز تازا ماعىناسىن بىلدىرەدى، حاربيننىڭ قارى مەن مۇزى دا ادەمى جانە تازا»، - دەدى، سپورتشى ءوزىنىڭ Instagram-پاراقشاسىنا.
اقنار ارداق قىزى قازاقستاندىق اۋديتورياعا 2022-جىلى بەيجىڭ قىسقى وليمپياداسى كەزىندە تانىلعان.
