قىتايدا ۆيزا تالاپتارى جەڭىلدەتىلدى

وسىلايشا، ەل بيلىگى پاندەميا كەزىندە قۇلدىراعان تۋريزم سالاسىن قايتا قالىپقا كەلتىرۋگە كۇش سالىپ جاتىر. ۆيزانى وڭتايلاندىرۋ ساياساتىنىڭ ارقاسىندا قىتايعا ساياحاتتايتىن شەتەلدىك تۋريستەر سانى كۇرت ءوستى.

قىتاي ۆيزاعا قاتىستى جاڭا ساياساتىن جاريالادى. ەل بيلىگى وڭتۇستىك-شىعىس ازيا ەلدەرى قاۋىمداستىعىنا كىرەتىن مەملەكەتتەردەن كەلەتىن تۋريستەرگە تانىمال سيشۋانباننا ايماعىنا كىرۋگە رۇقسات بەردى. ەندى وسى ولكەگە 6 كۇنگە دەيىن ەركىن ساياحاتتاۋعا بولادى. بۇل قىتايداعى «قايماعى بۇزىلماعان» ەڭ كورىكتى اۆتونومدىق وكرۋگتىڭ ءبىرى. مۇندا اسىرەسە شەتەلدىكتەر ساياحاتتاۋعا ەرەكشە قۇمار. جۇرگىزىلگەن تالداۋ ولاردىڭ دەنى قىتايدىڭ مادەنيەتى، ءداستۇرى مەن تابيعاتىن تاماشالاۋعا قىزىعاتىندىعىن كورسەتكەن. بۇرىن تۋريستەر ەلگە كىرگەن كۇننىڭ وزىندە، اۆتونومدىق ايماققا بارۋ ءۇشىن قوسىمشا رۇقسات الىپ، قۇجات راسىمدەيتىن.

جاڭا جۇيە تۋريستەردى ەسەلەۋگە باعىتتالىپ وتىر. قازىردىڭ وزىندە كەلۋشىلەر از ەمەس. قىتايدىڭ تۋريزم اكادەمياسىنىڭ مالىمەتىنە جۇگىنسەك، بيىلعى جىلدىڭ العاشقى ايىندا 175 ەل مەن ايماقتان 3,4 ميلليون ادام ساياحاتتاعان. ونىڭ 700 مىڭعا جۋىعى شەتەلدىك تۋريستەر. بۇل الدىڭعى جىلدىڭ وسى كەزەڭىمەن سالىستىرعاندا 6,2 پايىزعا ارتىق. ءبىراق بۇل قىتاي بيلىگىنىڭ كوڭىلىنەن شىقپاي تۇر. سەبەپ، ەلدە پاندەميادان كەيىن تۋريزم سالاسىنان تۇسەتىن تابىس ءالى دە قالپىنا كەلمەگەن. ەندى تۋريستەرگە وڭتايلى جاعداي جاساۋ ماقساتىندا ەلدە شەتەلدىكتەردىڭ قولدانۋىنا جەڭىل موبيلدى تولەم جۇيەسى دە ەنگىزىلدى.

«چاينا يۋنيون پەي» كورپوراتسياسى جۇرگىزگەن ستاتيستيكاعا سايكەس العاشقى ايدىڭ وزىندە حالىقارالىق ساياحاتشىلارمەن جاسالعان اقشا اۋدارىمدارى 124 پايىزعا وسكەن. سونداي-اق قىزمەت كورسەتۋگە ەرەكشە ءمان بەرىلىپ جاتىر. ۆوكزالدار مەن اۋەجايلاردا اۋدارماشى قىزمەتى تەگىن كورسەتىلە باستادى. ساياحاتشىلاردىڭ قالتاسىنا قاراي ءتۇرلى دەڭگەيدەگى ەكسكۋرسيالىق باعىتتار اشىلدى.

گوجياكۋن، ق ح ر سىرتقى ىستەر مينيسترلىگىنىڭ رەسمي وكىلى:

- كەيىنگى كەزدە جۇرگىزىلىپ جاتقان ۆيزا ساياساتى قىتايدىڭ اشىق ەكونوميكا قۇرۋعا ۇمتىلىسىن كورسەتەدى. بۇگىندە ترانس شەكارالىق ساپارلار كەزىندەگى قۇجات راسىمدەۋگە قاتىستى 110 جەڭىلدىك ەنگىزىلىپ وتىر. ۆيزاسىز ترانزيت كەزىندە 240 ساعاتقا دەيىن قىتايدا ەركىن ساياحاتتاۋعا رۇقسات بەرىلگەن. 38 مەملەكەتكە ءبىرجاقتى ۆيزاسىز رەجيم قولدانىلادى. قىتايعا ۆيزاسىز كىرۋگە باعىتتالعان جەڭىلدىكتەردى بۇدان ءارى دە جالعاستىرا بەرەمىز.

قىتايدا ۆيزا تالاپتارى ءالى دە جەڭىلدەيدى. ءبىراق بىردەن ەمەس. بىرتە-بىرتە. كەيىنگى ەكى جىلدىق تاجىريبەگە سايكەس مۇنداي وزگەرىستەر جىل سايىن ەكى رەت جۇرگىزىلەتىن بولعان.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى