قىتايدا ترانزيتتىك ۆيزاسىز ءجۇرۋ مەرزىمى 10 كۇنگە ۇزارتىلدى
استانا. KAZINFORM - قىتايدىڭ ۇلتتىق كوشى- قون باسقارماسى 17- جەلتوقسان كۇنى جاڭا ەرەجە جاريالادى، دەپ حابارلايدى شينحۋا اگەنتتىگى.
ەندى ترانزيتتىك ۆيزاسىز كىرۋ ءتارتىبى تولىقتاي جەڭىلدەتىلىپ، شەتەل ازاماتتارىنىڭ قىتاي اۋماعىندا ۆيزاسىز ءجۇرۋ ۋاقىتى 72 ساعات پەن 144 ساعاتتان 240 ساعاتقا (10 كۇنگە) دەيىن ۇزارتىلدى. سونىمەن قاتار، ترانزيتتىك ۆيزاسىز كىرۋشىلەرگە ارنالعان 21 جاڭا وتكىزۋ بەكەتى ىسكە قوسىلدى جانە رۇقسات ەتىلگەن ايماقتار كەڭەيتىلدى.
جاڭا تارتىپكە سايكەس، رەسەي، برازيليا، ۇلىبريتانيا، اقش، كانادا جانە تاعى باسقا 54 ەلدىڭ ازاماتتارى قىتاي ارقىلى ءۇشىنشى ەلگە بارار جولدا 24 پروۆينتسيا (ايماق، قالا) اۋماعىنداعى 60 حالىقارالىق وتكىزۋ بەكەتى ارقىلى ۆيزاسىز كىرىپ، 240 ساعات بويى بەلگىلەنگەن ايماقتاردا جۇرە الادى.
بۇل وزگەرىستىڭ باستى ەرەكشەلىگى - شەتەل ازاماتتارىنا ايماقتار اراسىندا ەركىن ءجۇرىپ- تۇرۋعا مۇمكىندىك بەرۋ. ياعني، ترانزيتتىك ۆيزاسىز رەجيم اياسىندا كەلگەن شەتەلدىكتەر قىتايدىڭ 24 پروۆينتسياسى اۋماعىندا بىرنەشە ءوڭىردى ەركىن ارالاي الادى.
الايدا بۇل تىزىمگە قازاقستان كىرمەيدى، سوندىقتان قازاقستاندىق ازاماتتار ءۇشىن بۇرىنعى ۆيزالىق تالاپتار ساقتالادى.
