قىتايدا نەكە قيۋ كورسەتكىشى تاعى دا قۇلدىرادى
استانا. KAZINFORM - قىتايدىڭ ازاماتتىق ىستەر مينيسترلىگى «ازاماتتىق اكىمشىلىك بويىنشا 2024 - جىلدىڭ ءتورت توقسانىنداعى ستاتيستيكالىق دەرەكتەر ەسەبىن» جاريالادى، دەپ حابارلايدى The Paper جاڭالىقتار پورتالى.
مينيسترلىكتىڭ مالىمەتىنشە، 2024 -جىلى قىتايدا 6106000 جۇپ نەكەگە تىركەلىپ، 2621000 جۇپ اجىراسۋ تۋرالى كۋالىك العان.
The Paper كەلتىرگەن دەرەكتەرگە سايكەس، 2023 -جىلى قىتايدا 7680000 جۇپ نەكە قيىپ، 2593000 جۇپ اجىراسقان بولاتىن. دەمەك، 2024 -جىلى تىركەلگەن نەكە سانى %20,5 عا ازايسا، اجىراسقانداردىڭ سانى %1,1عا كوبەيگەن.
سينگاپۋرلىق «Lianhe Zaobao» باسىلىمىنىڭ مالىمەتىنشە، قىتايدا نەكە قيۋ كورسەتكىشى 2014 -جىلدان كەيىن جىل ساناپ ازايىپ، 2023 -جىلى عانا بولماشى سەرپىلىس كورسەتكەن بولاتىن.
باسىلىمنىڭ اتاپ وتۋىنشە، قىتايلىق تاۋەلسىز دەموگراف حە يافۋ وتكەن جىلدىڭ قاراشا ايىندا 2023 -جىلى نەكە قيۋ كورسەتكىشىنىڭ 2022 -جىلمەن سالىستىرعاندا قايتا كوتەرىلۋىنىڭ سەبەبى جايلى WeChat الەۋمەتتىك جەلىسى ارقىلى پىكىر بىلدىرگەن. ونىڭ ايتۋىنشا، بۇل قۇبىلىسقا 2020-2022 -جىلدارى COVID-19 پاندەمياسىنىڭ سالدارىنان كوپتەگەن بولاشاق جۇبايدىڭ ۇيلەنۋ جوسپارىن كەيىنگە قالدىرۋى سەبەپ بولعان.
باسىلىمنىڭ جازۋىنشا، قىتاي ەكونوميكاسىنداعى بەلگىسىزدىك پەن ەل بويىنشا تۇرمىس قۇنىنىڭ ۇزدىكسىز ءوسۋى جاستاردى ۇيلەنۋ ءىسىن كەيىنگە شەگەرۋگە ءماجبۇر ەتىپ وتىر.
