قىتايدا جول اپاتىنان جىلىنا 60 مىڭداي ادام وپات بولادى
استانا. KAZINFORM - قىتاي - الەمدەگى جول اپاتى ەڭ كوپ بولاتىن ەلدەردىڭ ءبىرى. مۇندا تاۋلىگىنە 160-تان استام ادام جول اپاتىنان كوز جۇمادى. ەل بيلىگى ءتۇرلى شارالاردى قولدانىپ، قاتاڭ شەكتەۋلەر ەنگىزگەنىمەن ماسەلە شەشىلمەي تۇر.
ءتىپتى وزىق ۇلگىدەگى ينفراقۇرىلىم دا اپاتتى توقتاتۋعا سەپ بولار ەمەس. ستاتيستيكاعا سايكەس قىتايدا جىلىنا 255 مىڭنان استام جول-كولىك وقيعاسى تىركەلەدى. سالدارىنان 60 مىڭنان استام ادام وپات بولادى. تاعى 250 مىڭعا تارتا ادام ءتۇرلى دەنە جاراقاتىن الادى. اسىرەسە موپەد پەن ەلەكتروۆەلوسيپەد تىزگىندەگەندەر اپاتقا ءجيى ۇشىرايدى. ەرەجە بولا تۇرا، كوبى باعدارشام بەلگىلەرىنە قارامايدى، باعىنبايدى، اسىعىس جۇرەدى.
بۇگىندە ەل اۋماعىندا 350 ميلليون وسىنداي كولىك ءتۇرى تىركەلگەن. كەيىنگى ءۇش جىلدا قوس دوڭگەلەكتى كولىكتەردىڭ قاتىسۋمەن بولاتىن جول اپاتى سالدارىنان ادام ءولىمى %5,85- كە وسكەن. ال ەل ەكونوميكاسىنا 1,18 ميلليارد يۋان شىعىن كەلگەن. جۇرگىزىلگەن زەرتتەۋلەرگە سايكەس اۆتوماگيسترالدەردەگى جول اپاتىنىڭ %46- ءى ابدەن توزعان شينالاردى پايدالانۋ سالدارىنان بولاتىندىعى انىقتالعان.
اپاتقا ءجيى الىپ كەلەتىن تاعى ءبىر سەبەپتىڭ ءبىرى - تەلەفون. بۇل ماسەلە ءبىزدىڭ ەلدەگىدەي قىتايدا دا وتكىر تۇر. جول جيەگىندەگى ميلليونداعان بەينەكامەرا، جول ەرەجەسى، قاتاڭ شەكتەۋلەردىڭ اسەرى شامالى. جىل سايىن سالاعا قۇيىلاتىن ميللياردتاعان قارجى، جولداردىڭ تەگىستىگى مەن كوش ىلگەرى دامىعان ينفراقۇرىلىم دا كومەكتەسپەيدى.
سونداي-اق ماس كۇيىندە كولىك جۇرگىزەتىندەرگە زاڭ قاتاڭ. ماسەلەن، بەيجىڭدە مۇنداي جۇرگىزۋشىلەر 15 كۇنگە قامالادى. قوعامدىق قاۋىپسىزدىك ورگاندارى 5 جىلعا دەيىن كولىك جۇرگىزۋ قۇقىعىنان ايىرادى. ال زاڭدى بىرنەشە رەت بۇزعانداردىڭ ۇستىنەن قىلمىستىق ءىس قوزعالادى. 2024 -جىلى قىتايدا كولىكتى ماس كۇيىندە باسقارعان 303 مىڭ جۇرگىزۋشى ۇستالعان. ونىڭ 250 مىڭىنىڭ ۇستىنەن ءىس قوزعالدى. دەگەنمەن كەيىنگى جىلدارى زاڭنىڭ قاتاڭداۋىنا بايلانىستى كورسەتكىش %41- كە تومەندەگەن.
كولىك جۇرگىزۋشىلەرىنە قاتىستى تاعى ءبىر قىزىق دەرەك. قىتايدا جىلىنا ءار كولىك جۇرگىزۋشىسىنە 12 بال بەرىلەدى. ەگەر جۇرگىزۋشى جول ەرەجەسىن بۇزعان جاعدايدا وسى بال شەگەرىلىپ وتىرادى. كىمنىڭ قانشا رەت جانە قانداي ەرەجە بۇزعاندىعى ارنايى بازادا تىركەلەدى. ال ەندى بال مۇلدەم تاۋسىلعان جاعدايدا جۇرگىزۋشى جول-كولىك ەرەجەسىنە قاتىستى ەمتيحان تاپسىرۋعا مىندەتتەلەدى. ەمتيحاننان وتە الماسا، جۇرگىزۋشى كۋالىگىنەن ايىرىلادى.
24.kz
