قىتايدا حوككەي سپورتىنىڭ دەڭگەيى ءوسىپ كەلەدى - سامات دانيار
حاربين. KAZINFORM - حوككەيدەن قازاقستان ەرلەر قۇراماسىنىڭ ويىنشىسى قىتايدىڭ حاربين قالاسىنادا ءوتىپ جاتقان Ⅸ قىسقى ازيا ويىندارىنىڭ جارتىلاي فينالدىق ويىنىنان كەيىن Kazinform تىلشىسىنە قىتاي قۇراماسىمەن بولعان ويىن تۋرالى پىكىرىن ءبىلدىردى.
قازاقستاندىق قورعاۋشى ويىن ويداعىداي وتكەنىن ايتتى.
- ويىن جاقسى ءوتتى. ءبىز كوپ ۋاقىت ەسەپ اشا المادىق. ەكىنشى كەزەڭ ءبىز ءۇشىن ءساتتى بولدى. سەبەبى، ءبىز ولاردىڭ وسال تۇستارىن تاۋىپ، شايبا سوعا بىلدىك. سوڭعى كەزەڭدە ءبىز سەنىمدى جەڭىسكە قول جەتكىزدىك، - دەدى ول.
سونىمەن قاتار سپورتشى جارتىلاي فينالدىق ويىن توپتىق كەزەڭگە قاراعاندا باسقاشا ەكەنىن جاسىرمادى.
- بۇل - جارتىلاي فينالدىق ويىن. بارلىعى جەڭىس ءۇشىن، فينالعا جولداما الۋ ءۇشىن كۇرەسەدى. سول سەبەپتى ءبارى باسقاشا ءوتتى. ولارعا مۇمكىندىك بەرىپ قويعانىمىزعا قاراماستان، ءبىز جەڭىسكە جەتتىك، - دەدى سامات.
قازاقستاندىق حوككەيشى قىتايدا اتالعان سپورت ءتۇرىنىڭ جاقسى دامىپ كەلە جاتقانىنا توقتالدى.
- ءبىز وسىعان دەيىن بىرنەشە مارتە كەزدەستىك. ارينە، قىتاي قۇراماسىنىڭ دەڭگەيى جىل ساناپ ءوسىپ كەلە جاتىر. الايدا، بىزدە ءبىر ورىندا تۇرعان جوقپىز. سول سەبەپتى، الدا تاعى ولارمەن قىزىقتى ويىندار بولادى دەپ ويلايمىن، - دەيدى سامات دانيار.
ايتا كتەتەيىك، حاربيندە ءوتىپ جاتقان قىسقى ازيا ويىندارىنىڭ حوككەيدەن ەرلەر اراسىنداعى جارتىلاي فينالدىق ويىندار بۇگىن باستالدى. قازاقستان قۇراماسى قىتايلىقتاردى 3:1 ەسەبىمەن جارىس جولىنان تايدىردى.
بۇعان دەيىن، قازاقستاندىقتار توپتىق كەزەڭدە قىتاي قۇراماسىن 6:1 ەسەبىمەن جەڭگەن بولاتىن.
