قىتاي چيپكە سالىنعان سانكسيالارعا جاۋاپ رەتىندە ا ق ش- قا گاللي، گەرماني جانە سۋرما ەكسپورتتاۋعا تىيىم سالدى
استانا. KAZINFORM - قىتاي چيپتەرگە قويىلعان شەكتەۋگە بايلانىستى ا ق ش- قا گاللي، گەرماني، سۋرما جانە باسقا دا پايدالى قازبالار ەكسپورتتاۋعا تىيىم سالاتىنىن مالىمدەدى، دەپ جازادى The Hill.
قىتايدىڭ ساۋدا مينيسترلىگى بۇل قادامعا ۆاشينگتون ەكسپورتتىق باقىلاۋعا جاتاتىن قىتايلىق كومپانيالار ءتىزىمىن كومپيۋتەرلىك چيپتەر شىعاراتىن جابدىقتى، باعدارلامالىق قامتاماسىز ەتۋ جانە وتكىزۋ قابىلەتتىلىگى جوعارى جاد ميكروسحەمالارىن كەڭەيتكەننەن كەيىن باردى.
ساۋدا شەكتەۋلەرىنىڭ كۇشەيۋى جاڭادان سايلانعان پرەزيدەنت دونالد ترامپتىڭ قىتايدان جانە باسقا ەلدەردەن يمپورتتالاتىن تاۋارلارعا باج سالىعىن كۇرت كوتەرۋمەن قورقىتۋىمەن بايلانىستى، بۇل ءوز كەزەگىندە ساۋدا مەن تەحنولوگيالىق شيەلەنىستى كۇشەيتۋى مۇمكىن.
- قىتاي جارتىلاي وتكىزگىشتەردى ەكسپورتتاۋدى باقىلاۋدى جاڭارتۋعا، قىتايلىق كومپانيالارعا قارسى سانكسيالارعا جانە قىتايدىڭ تەحنولوگيالىق پروگرەسىنىڭ قاساقانا جولىن كەسۋگە بايلانىستى ا ق ش- قا قاتاڭ نارازىلىق ءبىلدىردى، - دەدى قىتاي سىرتقى ىستەر مينيسترلىگىنىڭ رەسمي وكىلى لين تسزيان.
2023 -جىلدىڭ شىلدەسىندە قىتاي ەكسپورتتاۋشىلاردان گالليي مەن گەرماني سياقتى ستراتەگيالىق ماتەريالداردى ا ق ش-قا جونەلتۋگە ليتسەنزيا الۋدى تالاپ ەتەتىنىن ايتتى. تامىز ايىندا قىتايدىڭ ساۋدا مينيسترلىگى اككۋمۋلياتوردان قارۋ-جاراققا دەيىنگى ونىمدەردىڭ كەڭ اۋقىمىندا قولدانىلاتىن سۋرمانى ەكسپورتتاۋدى شەكتەيتىنىن جانە گرافيت ەكسپورتىنا قاتاڭ باقىلاۋ ورناتاتىنىن مالىمدەدى.
مۇنداي پايدالى قازبالار ۇلتتىق قاۋىپسىزدىك ءۇشىن ماڭىزدى. قىتاي - جالىنعا قارسى زاتتاردا، باتارەيالاردا، تۇندە كورەتىن كوزىلدىرىكتەردە جانە يادرولىق قارۋدا قولدانىلاتىن سۋرمانىڭ نەگىزگى ءوندىرۋشىسى.
بەيجىڭ سەيسەنبىدە جاريالاعان شەكتەۋلەرگە گاۋھار تاستار جانە باسقا تىعىز سينتەتيكالىق ماتەريالدار سياقتى وتە قاتتى ماتەريالدار ەكسپورتى دا كىرەدى. ولار كەسكىش قۇرالدار، ديسكىلى تەجەگىشتەر جانە قورعانىس جابىندارى سياقتى كوپتەگەن ونەركاسىپتە قولدانىلادى.
