قىتاي ترامپ اكىمشىلىگىن ءوزارا تاريفتەردەن تولىقتاي باس تارتۋعا شاقىردى

ا ق ش پرەزيدەنتى دونالد ترامپ شىعىس جاعالاۋ ۋاقىتىمەن 12-ءساۋىر كۇنى كومپيۋتەرلەردىڭ، سمارتفونداردىڭ، جارتىلاي وتكىزگىش وندىرىسىنە ارنالعان قۇرىلعىلاردىڭ جانە ينتەگرالدىق تىزبەكتەردىڭ ءوزارا تاريفتەر ساياساتى بويىنشا ەنگىزىلگەن باج سالىعىنان بوساتىلعانىن مالىمدەدى.

وسىعان بايلانىستى ق ح ر ساۋدا مينيسترلىگىنىڭ رەسمي سايتى 13-ءساۋىر كۇنى مالىمدەمە جاريالادى.

مالىمدەمەدە ا ق ش بيلىگىنىڭ ساۋدا سەرىكتەستەرىنە جوعارى تاريفتەر ەنگىزۋ تۋرالى شەشىمىنىڭ ورىندالۋىن 90 كۇنگە كىدىرتكەننەن كەيىن، ءتيىستى ساياساتقا ەكىنشى مارتە تۇزەتۋ ەنگىزىپ وتىرعانى اتاپ كورسەتىلدى.

- انىعىندا، بۇل - ا ق ش-تىڭ ءبىرجاقتى ءوزارا تاريفتەر ساياساتىنىڭ قاتەلىگىن تۇزەتۋ جولىندا جاساعان بولماشى عانا قادامى، - دەلىندى مالىمدەمەدە.

مينيسترلىك ا ق ش-تىڭ اكىمشىلىك جارلىق ارقىلى ءوزارا تاريفتەر ەنگىزۋىن سىنعا الدى.

- بۇل ارەكەت ەكونوميكا مەن نارىق زاڭدارىنا قايشى جانە مەملەكەتتەر اراسىنداعى ءوزارا پايدالى ىنتىماقتاستىق پەن سۇرانىس-ۇسىنىس قاتىناستارىن ەسكەرمەۋ بولىپ سانالادى. ءوزارا تاريفتەر ا ق ش-تىڭ ىشكى پروبلەماسىن شەشە العان جوق، كەرىسىنشە، حالىقارالىق ساۋدا ءتارتىبىن ورەسكەل بۇزىپ، كاسىپورىنداردىڭ ءوندىرىسى مەن حالىقتىڭ تۇرمىسىنا كەرى اسەر ەتتى. بۇل - وزگەگە زيان، وزىنە دە جاقسى ەمەس، - دەلىنگەن مالىمدەمەدە.

مالىمدەمەدە قىتايدىڭ تاراپتار اراسىنداعى ساۋدا قاتىناستارى تۋرالى ۇستانىمىنىڭ ءارقاشان دايەكتى ەكەنى اتاپ كورسەتىلدى. قىتاي تاراپى ا ق ش-تى حالىقارالىق قاۋىمداستىق پەن ەلدەگى سالا وكىلدەرىنىڭ ۇستامدى ۇندەۋلەرىنە قۇلاق اسىپ، ءوز قاتەلىگىن تۇزەتۋ جولىندا ناقتى ءارى ۇلكەن قادام جاساپ، ءوزارا تاريفتەر تۋرالى اعات شەشىمنەن تولىقتاي باس تارتۋعا جانە كەلىسپەۋشىلىكتەردى شەشۋدىڭ ءوزارا قۇرمەت پەن تەڭ قۇقىلى ديالوگقا نەگىزدەلگەن دۇرىس جولىنا ورالۋعا شاقىردى.

بۇعان دەيىن ترامپ اكىمشىلىگىنىڭ سمارتفوندار، كومپيۋتەرلەر جانە باسقا دا ەلەكترونيكا جاھاندىق ءوزارا باج سالىعىنان بوساتىلاتىنىن مالىمدەگەنى تۋرالى حابارلاعان ەدىك.

اۆتور

ەرلان مازان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى