قىتاي س ءى م باسپا ءسوز قىزمەتىنىڭ جەتەكشىسى: ا ق ش - تەك قاعاز جولبارىس، ءتۇرتىپ قالسا تەسىلەدى

ماو نين 11-ءساۋىر كۇنى تاڭەرتەڭ X پلاتفورماسىندا: «قىتاي ەشقاشان قوقان-لوقى جاسامايدى - ال وندايلاردى ءبىز بىردەن تانيمىز» دەپ جازدى.

بۇل جازباعا قوسا سالىنعان سۋرەتتە ماۋزىدۇڭنىڭ 1964 -جىلعى مالىمدەمەسىنىڭ اعىلشىنشا ءماتىنى كەلتىرىلگەن:

- ا ق ش كەي ەلدەردى قورقىتىپ، ولاردىڭ بىزبەن ساۋدا جاساسۋىنا جول بەرمەي وتىر. ءبىراق امەريكا - تەك قاعاز جولبارىس، سەندەر وعان سەنىم ارتپاڭدار، ول ءتۇرتىپ قالساق تەسىلگەلى تۇر.

ءسويتىپ، ا ق ش پەن قىتاي اراسىنداعى ساۋدا جانجالى ورشىگەننەن بەرى ماو نين X پلاتفورماسىندا قاتارىنان ەكى كۇن بويى ماۋزىدۇڭنىڭ «قاناتتى سوزدەرىمەن» ءبولىستى.

10- ءساۋىر كۇنى ول ماۋزىدۇڭنىڭ 1953 -جىلى اقپاندا قىتاي حالىقتىق ساياسي كونسۋلتاتيۆتىك كەڭەسىنىڭ جينالىسىندا سويلەگەن سوزىنەن بەينەۇزىندى جاريالاعان بولاتىن. بەينەۇزىندىدە ماۋزىدۇڭ كورەي سوعىسى تۋرالى بىلاي دەيدى:

- بۇل سوعىستىڭ قانشا ۋاقىتقا سوزىلاتىنىن ءبىز شەشپەيمىز. بۇل ماسەلەنى بۇعان دەيىن ترۋمەن شەشكەن، ەندى ەيزەنحاۋەر نەمەسە قۇراما شتاتتاردىڭ بولاشاق پرەزيدەنتتەرى شەشە جاتار. ياعني، ولار بۇل سوعىستى قانشا ۋاقىتقا دەيىن جالعاستىرامىز دەسە، ءبىز دە سونشا ۋاقىتقا - تولىق جەڭىسكە جەتكەنگە دەيىن جالعاستىرامىز!

ماو نيننىڭ بۇل جازباسى X جەلىسىندە قازىرگە دەيىن 10 ميلليوننان استام قارالىم جيناپ ۇلگەردى. بەيسەنبى كۇنى بۇل جاڭالىق ءبىرقاتار قىتايلىق ب ا ق- تا جاريالادى. «ماو نين ءتوراعا ماۋزىدۇڭنىڭ اسقاق لەبىزىن ەسكە تۇسىرەتىن بەينەجازبامەن ءبولىستى» دەگەن اقپارات قىتايدىڭ ينتەرنەت كەڭىستىگىندە ءدۇمپۋ تۋدىرىپ، قىزۋ تالقىلانىپ جاتىر.

بۇعان دەيىن قىتاي س ءى م رەسمي وكىلىنىڭ «ا ق ش- تىڭ وكتەمدىگىنە جول بەرە المايمىز» دەپ مالىمدەگەنىن جازعان بولاتىنبىز.

اۆتور

ەرلان مازان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى