قىتاي س ءى م: اسكەري جاتتىعۋ - زاڭدى، قاجەتتى جانە ورىندى قادام
استانا. KAZINFORM - ق ح ر قارۋلى كۇشتەرى 17 -ناۋرىز كۇنى تايۆان بۇعازىنا تاياۋ تەڭىز ايدىنىندا اسكەري جاتتىعۋ وتكىزدى. قىتاي سىرتقى ىستەر مينيسترلىگى اتالعان اسكەري ارەكەتتى ا ق ش- تىڭ تايۆانعا قاتىستى ۇستانىمىنداعى ورەسكەل شەگىنىسكە جانە «تايۆان تاۋەلسىزدىگىن» جاقتايتىن كۇشتەردىڭ ارانداتۋشىلىق ارەكەتتەرىنە بەرىلگەن جاۋاپ دەپ اتادى.
بۇگىن وتكەن باسپا ءسوز ءماسليحاتىندا قىتاي س ءى م- ءنىڭ رەسمي وكىلى ماو نين قىتاي قارۋلى كۇشتەرىنىڭ تايۆان ماڭىنداعى اسكەري جاتتىعۋىنا قاتىستى پىكىر ءبىلدىردى.
جۋرناليستەردىڭ ءتيىستى سۇراقتارىنا جاۋاپ بەرە وتىرىپ، ول ا ق ش- تىڭ سوڭعى ارەكەتتەرىن سىنعا الدى.
- جاقىندا ا ق ش تايۆان ماسەلەسىندە ءبىرقاتار قاتە قادام جاسادى، اسىرەسە ا ق ش مەملەكەتتىك دەپارتامەنتىنىڭ رەسمي سايتىنداعى ا ق ش- تايۆان قارىم-قاتىناسىنا قاتىستى تىزىمدەمەنىڭ مازمۇنىنا وزگەرىس ەنگىزىپ، «ءبىر قىتاي» قاعيداتىن ۇستانۋ جانە «تايۆان تاۋەلسىزدىگىن» قولداماۋ تۋرالى ماڭىزدى تۇجىرىمداردى الىپ تاستادى. بۇل - ا ق ش- تىڭ «تايۆاندى قىتايعا قارسى پايدالانۋدان» باس تارتپاي، «تايۆان تاۋەلسىزدىگى» كۇشتەرىن ايتاقتاپ، ايداپ سالىپ وتىرعانىنىڭ تاعى ءبىر سۇرىقسىز دالەلى، - دەدى ماو نين.
رەسمي وكىل تايۆان ماڭىندا وتكەن اسكەري جاتتىعۋدى ەلدىڭ ەگەمەندىگى مەن اۋماقتىق تۇتاستىعىن قورعاۋعا باعىتتالعان «زاڭدى، قاجەتتى جانە ورىندى قادام» دەپ اتاپ ءوتتى.
- بۇل - «تايۆان تاۋەلسىزدىگىن» جاقتايتىن سىرتقى كۇشتەردىڭ ارەكەتىنە بەرىلگەن قاتاڭ جاۋاپ، «تايۆان تاۋەلسىزدىگىن» ماقسات ەتكەن سەپاراتيستىك كۇشتەرگە بەرىلگەن قاتال ەسكەرتۋ، - دەدى ماو نين.
ماو نين قىتاي ءۇشىن تايۆان ماسەلەسىنەن وتەر وزەكتى مۇددە جوق ەكەنىن اتاپ ءوتتى.
- ءبىر قىتاي قاعيداتى - قىتاي-ا ق ش قاتىناستارىنىڭ ساياسي ىرگەتاسى. ىرگەتاس بەرىك بولماسا، ەكى ەلدىڭ بايلانىسى ۋشىعا بەرمەك. «تايۆان تاۋەلسىزدىگى» مەن تايۆان بۇعازىنىڭ بەيبىتشىلىگى ءبىر-بىرىنە مۇلدە كەرەعار. «تايۆان تاۋەلسىزدىگىن» جاقتاۋشىلاردىڭ الدى تۇيىق، ارتى جار، ال «تايۆاندى قىتايعا قارسى پايدالانۋ» - وتپەن ويناعانداي قاۋىپتى ارەكەت»، - دەپ مالىمدەدى ماو نين.
رەسمي وكىل ا ق ش- تى «ءبىر قىتاي» قاعيداتىن بەرىك ۇستانىپ، قىتاي مەن ا ق ش اراسىنداعى 3 بىرلەسكەن مالىمدەمەنىڭ تالاپتارىن ساقتاۋعا، تايۆان ماسەلەسىنە بايلانىستى بۇعان دەيىن بەرىلگەن ۋادەلەردى ورىنداۋعا، سونداي-اق تايۆان بۇعازىنىڭ تۇراقتىلىعىنا قاۋىپ توندىرەتىن ارانداتۋشىلىق ارەكەتتەردەن باس تارتىپ، تايۆان بۇعازىنىڭ بەيبىتشىلىگى مەن قىتاي-ا ق ش قارىم-قاتىناسىنا زيان تيگىزەتىن ارەكەتتەردەن اۋلاق بولۋعا شاقىردى.
ايتا كەتەلىك قىتاي قورعانىس مينيسترلىگى تايۆانعا ەسكەرتۋ جاساعان ەدى.
اۆتور
ەرلان مازان
