قىتاي س ءى م ا ق ش پەن جاپونيانىڭ بىرلەسكەن مالىمدەمەسىنە قاتىستى پىكىر ءبىلدىردى
استانا. KAZINFORM - قىتاي سىرتقى ىستەر مينيسترلىگىنىڭ رەسمي وكىلى گو جياكۋن ا ق ش پەن جاپونيانىڭ بىرلەسكەن مالىمدەمەسىنە قاتىستى پىكىر ءبىلدىردى. بۇل تۋرالى ۆەدومستۆونىڭ رەسمي سايتى مالىمدەدى.
ونىڭ ايتۋىنشا، بىرلەسكەن مالىمدەمەدە قىتايعا قاتىستى ماسەلەلەردىڭ تىلگە الىنۋى قىتايدىڭ ىشكى ىسىنە كوپە-كورنەۋ كيلىگۋ، قىتايدى كۇيەلەۋ مەن قارالاۋ، ايماقتىق شيەلەنىستى ۋشىقتىرۋ بولماق. قىتاي بۇعان قاتاڭ نارازىلىق جانە باتىل قارسىلىق بىلدىرەدى.
- تايۆان ماسەلەسى - قىتايدىڭ ىشكى ءىسى، قىتايدىڭ نەگىزگى مۇددەلەرىنىڭ وزەگى، سوندىقتان وعان سىرتقى كۇشتەردىڭ ارالاسۋىنا جول بەرىلمەيدى. ا ق ش-تا، جاپونيا دا تايۆان ماسەلەسى بويىنشا قىتايعا رەسمي ۋادە بەرگەن. اسىرەسە جاپونيانىڭ تاريحتا تايۆانعا شاپقىنشىلىق جاساعان جانە وتارلىق ۇستەمدىك جۇرگىزگەن اۋىر قىلمىسى بار، سول ءۇشىن تايۆان ماسەلەسىندە ايرىقشا اباي بولعانى ءجون. قازىرگى ۋاقىتتا تايۆان بۇعازىنداعى بەيبىتشىلىكتىڭ ساقتالۋىنا باستى قاتەر «تايۆان تاۋەلسىزدىگى» سەپاراتيستىك ارەكەتتەرىنەن جانە ولارعا سىرتتان جاسالعان قولداۋ مەن قولپاشتاۋدان ءتونىپ وتىر. ەگەر ءتيىستى ەلدەر شىنىمەن بەيبىتشىلىك پەن تۇراقتىلىق ءۇشىن الاڭداۋشىلىق بىلدىرسە، ءبىر قىتاي قاعيداتىن بەرىك ۇستانىپ، «تايۆان تاۋەلسىزدىگىنە» اشىق قارسى تۇرۋى كەرەك، - دەپ اتاپ كورسەتتى گو جياكۋن.
رەسمي وكىلدىڭ پىكىرىنشە، تايۆان ايماعىنىڭ حالىقارالىق ۇيىمدار قىزمەتىنە اتسالىسۋى دا ءبىر قىتاي قاعيداتىنا سايكەس ىسكە اسىرىلۋى قاجەت. ەگەمەندى ەلدەر عانا قاتىسا الاتىن حالىقارالىق ۇيىمدارعا قوسىلۋعا تايۆانننىڭ ەشقانداي نەگىزى، ءۋاجى جانە قۇقىعى جوق.
ول دياويۋيداو (جاپونيا سەنكاكۋ دەپ اتايدى) ارالى مەن ونىڭ اينالاسىنداعى ارالشالاردىڭ ەجەلدەن قىتاي جەرى ەكەنىن ەسكە سالدى.
- قىتاي ەجەلدەن دۇنيەجۇزىلىك ساۋدا ۇيىمىنىڭ ەرەجەسىنە سايكەس ارەكەت ەتەدى، ايتالعان قىتايدىڭ «ەكونوميكالىق اگرەسسياسى» دەگەنىمىز ويدان شىعارىلعان دالباسا، - دەپ تۇيىندەدى ءسوزىن رەسمي وكىل.
RFI-دىڭ حابارلاۋىنشا، جاپونيانىڭ پرەمەر-ءمينيسترى سيگەرۋ يسيبا مەن ا ق ش پرەزيدەنتى دونالد ترامپ 7-اقپان كۇنى ۆاشينگتونداعى اق ۇيدە كەزدەسۋ وتكىزىپ، تاراپتار قارىم-قاتىناسىنىڭ جاڭا التىن داۋىرىنە جول اشۋعا باعىتتالعان بىرلەسكەن مالىمدەمەگە قول قويعان. مالىمدەمەدە تاراپتار تايۆان بۇعازىندا بەيبىتشىلىك پەن تۇراقتىلىقتى ساقتاۋدىڭ ماڭىزدىلىعىن اتاپ ءوتىپ، قالىپتاسقان جاعدايدى كۇش قولدانۋ نەمەسە تىزە باتىرۋ ارقىلى ءبىر جاقتى وزگەرتۋگە قارسىلىق بىلدىرگەن؛ تايۆاننىڭ حالىقارالىق ۇيىمدارعا تولىقتاي قاتىسۋىنا قولداۋ كورسەتكەن. مالىمدەمەدە سونداي-اق «ا ق ش- جاپونيا قاۋىپسىزدىك شارتىنىڭ» 5- بابىنىڭ سەنكاكۋ (دياويۋيداو) ارالىنا دا قولدانىلاتىنى اتاپ كورسەتىلىپ، قىتايدىڭ وڭتۇستىك قىتاي تەڭىزىندەگى زاڭسىز تالاپتارىنا، اسىرەسە ريفتەردى اسكەريلەندىرۋ مەن باسقا دا ارانداتۋ، سەس كورسەتۋ ارەكەتتەرىنە قارسىلىق بىلدىرىلگەن. بۇعان قوسا ا ق ش تاراپى قىتايدىڭ «ەكونوميكالىق اگرەسسياسىنا» قارسى كۇرەستە وداقتاستارىمەن ىنتىماقتاستىقتى كۇشەيتەتىنىن دە مالىمدەگەن.
اۆتور
ەرلان مازان
