قىتاي قۇراماسىنىڭ كاپيتانى: ءبىز قازاقستاندىقتاردان كوپ نارسە ۇيرەندىك
حاربين. KAZINFORM - حوككەيدەن قىتاي ەرلەر قۇراماسىنىڭ كاپيتانى جاڭ جياچي Kazinform تىلشىسىنە ەكسكليۋزۆتى سۇحبات بەرىپ، حوككەيدەن قازاقستان قۇراماسىنىڭ دەڭگەيىن جوعارى باعالادى.
قىتايلىق سپورتشى ەڭ اۋەلى جارىس تۋرالى ويىمەن ءبولىستى.
- جارىس ءوز الاڭىمىزدا ءوتىپ جاتقاندىقتان، بار كۇشىمىزدى سالىپ، ءوزىمىزدى سىناپ كورگىمىز كەلدى. قازاقستان قۇراماسىنىڭ دەڭگەيى بىزدەن جوعارى بولعانىنا قاراماستان، ءبىز ءۇمىت ۇزبەي، سىناققا بەتپە-بەت كەلدىك، - دەدى جاڭ جياچي.
قىتاي قۇراماسىنىڭ كاپيتانى جارىس ناتيجەسى كوڭىلدەرىنەن شىعاتىنىن ايتتى.
- ناتيجە قاناعاتتاندىرارلىق. ءبىز قورعانىستا جاقسى وينادىق. ءبىرىنشى كەزەڭدە قارسىلاستارعا مۇمكىندىك بەرگەن جوقپىز. ءتىپتى ءۇشىنشى كەزەڭدە ءبىر شايبا سوعىپ كەتتىك. قازاقستانمەن ويىن قيىن بولاتىنىن بىلدىك. الايدا، ءبىز ولاردان تاجىريبە الۋعا تىرىستىق، - دەيدى ول.
سونىمەن قاتار، جاڭ جياچي قازاقستان قۇراماسىنان كوپ نارسە ۇيرەنگەنىن ايتا كەتتى.
- قازاقستان قۇراماسى ءارقاشان مىقتى بولدى. ءبىز دە ولاردان كوپ نارسە ۇيرەندىك. ولاردىڭ پاس بەرۋى جانە الاڭداعى قوزعالىسى وتە جىلدام. اسىرەسە ولار پاستى قاقپانىڭ ارتىنان ءبىزدىڭ قورعانىس ايماعىمىزعا ءدال جەتكىزە الادى. بۇل وتە كەرەمەت، - دەيدى قىتاي حوككەي قۇراماسىنىڭ كاپيتانى.
ايتا كەتەيىك، قازاقستان ەرلەر حوككەي قۇراماسى بۇگىن قىسقى ازيا ويىندارىنىڭ جارتىلاي فينالىندا قىتايدى 3:1 ەسەبىمەن جەڭىپ، فينالعا جولداما الدى.
توپتىق كەزەڭدەگى كەزدەسۋدە، قازاقستان قۇراماسى قىتايلىقتارعا 6 شايبا سوققان بولاتىن.
سونداي-اق، حاربين قالاسىنىڭ تۇرعىنى ۆان رۋي Kazinfrom تىلشىسىنە قازاقستاندىق حوككەيشىلەردىڭ دەڭگەيى ازيا ەلدەرى اراسىندا جوعارى ەكەنىن ايتقان بولاتىن.
اۆتور
مۇحتار قاليموللا ۇلى
