قىتاي ەلشىسى قازاقستاننان كەتەتىن بولدى

قىتاي ەلشىسى جاڭ شياۋ قازاقستانداعى ديپلوماتيالىق قىزمەتىن 2018-جىلعى 30-تامىزدا باستاعان. بۇگىنگە دەيىن ول ەلىمىزدە 6 جىلدان استام ۋاقىت بويى ديپلوماتيالىق ميسسياسىن اتقاردى.

2023-جىلى ەكى ەل اراسىنداعى تاۋار اينالىمى العاش رەت 40 ميلليارد دوللاردان استى. بيىل دا ساۋدا اينالىمى ءوسىپ كەلەدى. مىسالى، قاڭتار-قىركۇيەك ايلارىندا 33 ميلليارد دوللارعا جەتىپ، %13 عا ءوستى. بۇل ناتيجە مەملەكەت باسشىلارىنىڭ بيىلعى شىلدە ايىندا قويعان تاۋار اينالىمىن جاقىن جىلدارى ەكى ەسەگە ارتتىرۋ ماقساتىنا جاقىن ەكەنىمىزدى كورسەتىپ وتىر، - دەدى ديپلومات سالتاناتتى كەشتە.

جاڭ شياۋ ەلدەرىمىز اراسىندا جۇزەگە اسىرىلعان جوبالاردى دا اتاپ ءوتىپ، ۆيزاسىز رەجيم قازاقستاندىقتارعا  ايتارلىقتاي جەڭىلدىك بولعانىن ايتتى.

پرەزيدەنت توقايەۆتىڭ دانا باسشىلىعىمەن بەرىك ىرگەتاس قالانىپ، ادىلەتتى قازاقستاننىڭ كونتۋرلارى ءبىزدىڭ كوز الدىمىزدا جانە ۇلكەن قارقىنمەن بەلگىلەنىپ كەلەدى. بۇل بۇگىنگى تاڭدا قازاقستاننىڭ دۇرىس جولدا كەلە جاتقانىنا جانە ساياسي-ەكونوميكالىق قايتا قۇرۋ بويىنشا العا قويىلعان مىندەتتەر دەر كەزىندە ورىندالاتىنىنا سەنىم ۇيالاتادى، - دەپ ايتتى قىتاي ەلشىسى.

ول قازاقستانداعى ديپلوماتيالىق ميسسياسى كەزىندە وزىنە قولداۋ كورسەتكەن بارلىق دوسىنا، ارىپتەسىنە العىسىن ءبىلدىردى.

ديپلومات قىزمەتىنە كەلگەندەر ءبىر جەردە تۇراقتى جۇمىس ىستەمەيدى. ەلشى رەتىندە مەن بۇعان دەيىن ۇيرەنىپ قالعانمىن. الايدا قازاقستانمەن قيماي قوشتاسامىن. سوڭعى 6 جىلدا كوپ قازاق دوس تاپتىم. قازاقستاننان كەتكەندە جۇرەگىمنىڭ ءبىر بولىگىن وسىندا قالدىرامىن. قايدا بولسام دا، بولاشاقتا نە ىستەسەم دە، قازاقستان مەن قىتاي-قازاقستان قارىم-قاتىناستارى ءارقاشان مەنىڭ نازارىمدا بولادى، - دەپ ايتتى ق ح ر ەلشىسى جاڭ شياۋ.

ەسكە سالا كەتەيىك، 2-جەلتوقسان كۇنى مەملەكەت باسشىسى قاسىم-جومارت توقايەۆ قىتاي حالىق رەسپۋبليكاسىنىڭ قازاقستانداعى ەلشىسى جاڭ شياۋدى قابىلداپ، ديپلوماتتى II دارەجەلى «دوستىق» وردەنىمەن ماراپاتتاعان بولاتىن.

baq.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى