قىتاي كولىكتەرى نەسىمەن قاۋىپتى؟ ساراپشىلار كۇمان تۋدىرعان سۇراقتارعا جاۋاپ بەردى

Massaget.kz ءتىلشىسى اۆتوكولىك وداعىنىڭ جاۋاپتى وكىلدەرىنەن سۇراپ ءبىلدى.

اۆتولىك وداعىنىڭ ساراپشىسى ەربول سەيپىلوۆ اۆتوكولىك قۇنى 2022-جىلعا قاراعاندا تومەندەگەنىن ايتادى.

«بىلتىر قاراشا ايىندا ەلىمىزدەگى جاڭا اۆتوكولىكتەردىڭ ورتاشا باعاسى 2,3 پايىزعا تومەندەپ، الدىڭعى جىلعى كورسەتكىشتەن قاراعاندا 14 ميلليون 810 مىڭ تەڭگە تەڭ بولدى. ول كەزدەگى باعانىڭ تومەندەۋى - جاڭا جىل الدىنداعى جەڭىلدىكتەر، اكسيالار جانە ديلەرلەر تاراپىنان تۇتۋىنۋشىعا ءتۇرلى ۇسىنىستارعا بايلانىستى بولدى. 2023-جىلى جەلتوقساندا اۆتوسالوندار تۇتىنۋشىلارعا 500 مىڭنان 4 ميلليون تەڭگەگە دەيىن جەڭىلدىكتەر جاسادى. ءوز كەزەگىندە، بۇل - شىنايى باسكەلەستىكتى ارتتىردى»، - دەدى ول.

ساراپشى قىتاي نارىعىنىڭ كەلۋىنە بايلانىستى اۆتوكولىك باعالارى تومەندەي مە دەگەن سۇراققا جاۋاپ بەردى.

«اۆتوكولىك باعاسىن بولجاپ، كەسىپ ايتۋ قيىن. ويتكەنى ولار ءارتۇرلى سىرتقى فاكتورلارعا، سونىڭ ىشىندە ۆاليۋتا باعامىنىڭ وزگەرۋىنە جانە اۆتوكولىك بولشەكتەرىنىڭ يمپورتىنا بايلانىستى. كەيدە لوگيستيكالىق قيىندىقتارعا تاپ بولىپ جاتامىز. ماسەلەن، پاندەميا كەزىندەگى وزگەرىستەر - تۇراقتى جەتكىزۋ تىزبەگى مەن لوگيستيكالىق پروتسەستەردىڭ ماڭىزىن كورسەتتى. دەگەنمەن، ەل ىشىندە اۆتوكومپونەنتتەر زاۋىتتارىنىڭ سالىنۋىن ەسكەرسەك، وندىرىستەگى قازاقستاندىق ءونىمنىڭ قامتۋ ۇلەسى ارتادى دەپ بولجاي الامىز. بۇل يمپورت پەن لوگيستيكاعا تاۋەلدىلىكتى ازايتىپ، باعانىڭ تۇراقتالۋىنا سەپتىگىن تيگىزەدى. ياعني سىرتقى فاكتورلاردىڭ اسەرىن جۇمسارتادى»، - دەيدى وداق وكىلى.

سەيپىلوۆ نارىقتا ەسكى كولىكتەردىڭ باعاسى قالاي شەشىلىپ جاتقانىن ايتتى.

«ەسكى اۆتوكولىكتەردىڭ باعاسىنا كەلەتىن بولساق، ونى جەكە تۇلعا اۆتوكولىكتىڭ تەحنيكالىق جاعدايىن ەسكەرە وتىرىپ، دەربەس بەلگىلەيدى»، - دەدى سەيپىلوۆ.

ەلىمىزدە قىتايدان كەلگەن كولىكتەردىڭ ساپاسىنا سىنمەن قارايتىن ادام كوپ. ساراپشى ولاردىڭ كۇمانى بەكەر ەكەنىن اتاپ ءوتتى.

«قىتاي كولىكتەرى - قاۋىپسىز. سەبەبى ەلىمىزگە تاۋارىن الىپ كەلەتىن ديللەردىڭ ءبارى كولىك قۇرالىنىڭ ءتيپىن ماقۇلداۋ سەرتيفيكاتسياسىنان وتەدى. بۇل - مەملەكەتتىك قۇزىرلى ورگانمەن ماقۇلدانىپ، تەكسەرىلەدى. سوندىقتان رەسمي تۇردە ساتىلاتىن اۆتوكولىكتەر قاۋىپسىزدىك تالاپتارىنا ساي بوپ كەلەدى. ناقتىراق ايتساق، بۇل زاڭ «دوڭعالاقتى كولىك قۇرالدارىنىڭ قاۋىپسىزدىگى تۋرالى» تەحنيكالىق رەگلامەنتىندە بەلگىلەنگەن. وندا اۆتوكولىك - ادام دەنساۋلىعى جانە قورشاعان ورتانى قورعاۋ قاۋىپسىزدىگىن قامتاماسىز ەتەتىن تالاپتارعا ساي بولۋعا ءتيىس»، - دەيدى ول.

قازاقستان ءرولى وڭ جاقتاعى كولىكتەردى اكەلۋگە نەگە تىيىم سالىپ وتىر؟

ساراپشىلار ءبىر اۋىزدان وڭ ءرولدى كولىك تىزگىندەگەندە جول بەلگىلەرى مەن سيگنالداردى دۇرىس كورمەۋ، جولاۋشىلاردى وتىرعىزۋ جانە ءتۇسىرۋ ەرەجەلەرىن ساقتاماۋ، اسىرەسە تار كوشەلەردە باسىپ وزعاندا جولدىڭ دۇرىس كورىنبەۋى، شام جارىعى تۇسەتىن بۇرىشتاردىڭ دۇرىس ورنالاسپاۋى سالدارىنان جۇرگىزۋشىلەردىڭ كوزىن شاعىلىستىرىپ، كەدەرگى كەلتىرۋ، سونىمەن قاتار، جولدىڭ وڭ جاق جيەگىنىڭ ناشار كورىنۋى سياقتى قاۋىپتى كەمشىلىكتەر انىقتادى.

«قازاقستانعا وڭ ءرولدى اۆتوموبيل اكەلۋگە تىيىم سالۋ - جولداعى قاۋىپسىزدىكتى قامتاماسىز ەتۋ ءۇشىن جاسالعان ماڭىزدى ءارى ويعا قونىمدى قادام. وڭ ءرولدى اۆتوموبيل كىرگىزۋدى شەكتەمەسە، ەل ازاماتتارى ولاردى ساتىپ الىپ، پايدالانعاندا زاڭدى جولمەن جۇزەگە اسىرۋ مۇمكىن بولمايتىن قيىندىقتارعا كەزىگەدى. بيلىك ەنگىزگەن شەكتەۋ ەل ازاماتتارىنىڭ مۇددەسىن قورعاپ، جول قاۋىپسىزدىگىن قامتاماسىز ەتۋگە باعىتتالعان»، - قازاقستاننىڭ اۆتوكولىك وداعىنىڭ پرەزيدەنتى انار ماقاشيەۆا.

ەسكە سالا كەتسەك، قازاقستاندا ءرولى وڭ جاقتا ورنالاسقان كولىكتەردى بولشەكتەلگەن تۇردە اكەلۋگە جارتى جىلعا تىيىم سالىندى. ءتيىستى بۇيرىق 16- قاڭتاردان باستاپ كۇشىنە ەندى.

ونەركاسىپ جانە قۇرىلىس مينيسترلىگىنىڭ دەرەگىنشە، بىلتىرعى 11 ايدىڭ قورىتىندىسى بويىنشا ەل اۋماعىنا ءبىر رەتتىك زاڭداستىرۋ اياسىندا 240 مىڭنان استام كولىك زاڭداستىرىلعان.

«ونىڭ ىشىندە 22 مىڭعا جۋىعى كونسترۋكتور، ياعني وڭ جاق ءرولدى كولىكتەر. بۇيرىق كۇشىنە ەنگەنگە دەيىن كەلگەن ماشينالار بەلگىلەنگەن زاڭناما شەڭبەرىندە زاڭداستىرىلاتىن بولادى»، - دەگەن ەدى مينيسترلىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى