قىتاي دەپۋتاتتارى قازاقستاندا جۇرگىزىلىپ جاتقان رەفورمالاردى وڭ باعالادى
استانا. KAZINFORM - ءماجىلىس سپيكەرى ەرلان قوشانوۆ بۇكىلقىتايلىق حالىق وكىلدەرى جينالىسى تۇراقتى كوميتەتى ءتوراعاسىنىڭ ورىنباسارى حاو مينتسزينمەن كەزدەستى.
تاراپتار ەلدەر اراسىنداعى پارلامەنتارالىق، ەكونوميكالىق جانە مادەني-گۋمانيتارلىق ىنتىماقتاستىقتى دامىتۋ پەرسپەكتيۆالارىن تالقىلادى.
قىتاي حالىق رەسپۋبليكاسى بۇكىلقىتايلىق حالىق وكىلدەرى جينالىسىنىڭ دەلەگاتسياسىمەن كەزدەسۋدە ەرلان قوشانوۆ الەمدەگى كۇردەلى جاعدايعا قاراماستان، قازاقستان مەن قىتاي سەنىمدى سەرىكتەس ءارى تاتۋ كورشى بولىپ قالا بەرەتىنىن اتاپ ءوتتى.
- قىتايمەن ىنتىماقتاستىقتى دامىتۋ - قازاقستاننىڭ سىرتقى ساياساتىنداعى باسىم باعىتتىڭ ءبىرى. بيىل قازاقستان مەن قىتاي اراسىندا ديپلوماتيالىق قارىم-قاتىناس ورناعانىنا 32 جىل تولدى. وسى جىلدار ىشىندە ەكىجاقتى ىنتىماقتاستىعىمىز ەڭ جوعارى - ماڭگىلىك جان-جاقتى ستراتەگيالىق سەرىكتەستىك دەڭگەيىنە كوتەرىلدى. بۇل - ءبىرىنشى كەزەكتە، مەملەكەتتەرىمىزدىڭ باسشىلارى ەڭبەگىنىڭ ناتيجەسى، - دەدى ءماجىلىس ءتوراعاسى.
ەرلان قوشانوۆ قىتايلىق ارىپتەستەرىنە «كۇشتى پرەزيدەنت - ىقپالدى پارلامەنت - ەسەپ بەرەتىن ۇكىمەت» فورمۋلاسىنا سايكەس بيلىكتىڭ بارلىق تارماقتارىن جاڭارتۋعا جول اشقان ەلدەگى اۋقىمدى رەفورمالار تۋرالى ايتىپ بەردى. سپيكەر پالاتا جۇمىسىنىڭ جوسپارلارىمەن ءبولىسىپ، التى فراكسيا مەن ءبىر مانداتتى دەپۋتاتتاردىڭ قاتىسۋى زاڭنامالىق تالقىلاۋلاردىڭ ساپاسىنا وڭ اسەر ەتكەنىنە نازار اۋداردى.
ءوز كەزەگىندە حاو مينتسزين قىتاي مەن قازاقستاننىڭ جاقىن كورشى عانا ەمەس، سەنىمدى سەرىكتەس ءارى شىنايى دوس ەكەنىنە توقتالدى.
- مەنىڭ جانە ءبىزدىڭ دەلەگاتسيا مۇشەلەرىنىڭ كوپشىلىگى ءۇشىن بۇل - قازاقستانعا العاشقى ساپار. ايتا كەتۋ كەرەك، پرەزيدەنت قاسىم-جومارت توقايەۆتىڭ باسشىلىعىمەن ەلدەرىڭىزدە قارقىندى ەكونوميكالىق دامۋ جانە الەۋمەتتىك تۇراقتىلىق پەن بىرلىكتىڭ جوعارى دەڭگەيى بايقالادى. سىزدەردىڭ باستامالارىڭىز بارلىق سالادا جۇيەلى تۇردە العا جىلجىپ كەلەدى. مۇنىڭ ءبارى بىزگە ەرەكشە اسەر قالدىردى، - دەدى بۇكىلقىتايلىق حالىق وكىلدەرى جينالىسى تۇراقتى كوميتەتى ءتوراعاسىنىڭ ورىنباسارى.
حاو مينتسزين «ءبىر بەلدەۋ - ءبىر جول» باستاماسى اياسىنداعى ىنتىماقتاستىقتى جوعارى باعالاپ، 2023 -جىلدىڭ قورىتىندىسى بويىنشا قازاقستان مەن قىتاي اراسىنداعى ەكىجاقتى تاۋار اينالىمى رەكوردتىق مولشەرگە جەتكەنىن ايتتى.
دەپۋتاتتار پارلامەنتارالىق ديپلوماتيا جەلىسى بويىنشا جۇمىستى كۇشەيتۋ، كوميتەتتەر مەن دوستىق توپتارى اراسىنداعى ىنتىماقتاستىقتى كەڭەيتۋ تۋرالى ۋاعدالاستى.
