قىتاي استەرويدقا قارسى قورعانىس جۇيەسىن قۇرماق
استانا. قازاقپارات - 2024 YR4 دەپ اتالاتىن استەرويد 8 جىلدان كەيىن جەرگە سوقتىعىسۋى مۇمكىن. NASA نىڭ بولجامىنا بايلانىستى قىتايلىق استرونومدار ناقتى قاۋىپ دەڭگەيىن انىقتاۋ ءۇشىن باقىلاۋ جۇمىستارىن جالعاستىرۋدىڭ قاجەتتىلىگىن مالىمدەدى.
Lianhe Zaobao باسىلىمىنىڭ حابارلاۋىنشا، قىتاي جەرگە جاقىن استەرويدتارعا قارسى قورعانىس جۇيەسىن قۇرۋعا كىرىسىپ كەتكەن.
قىتايلىق استرونومدار اتالعان بولجامعا بولا دۇرلىگۋگە ەش نەگىز جوق ەكەنىن ايتادى. ولاردىڭ پىكىرىنشە، قازىرگى باستى مىندەت - استەرويدتىڭ وربيتاسىن مۇقيات باقىلاۋ جانە ناقتى تراەكتورياسىن ەسەپتەۋ. ەگەر ونىڭ بولاشاقتا ادامزاتقا شىنىمەن قاۋىپ توندىرەتىنى دالەلدەنسە، قاراستىرىلىپ وتىرعان ىقتيمال قورعانىس ستراتەگيالارى دا جوق ەمەس. بۇل باعىتتا قىتاي «جەرگە جاقىن استەرويدتارعا قارسى قورعانىس جۇيەسىن» قۇرۋدى قولعا الدى. سونداي-اق الەم عالىمدارى دا «پلانەتارلىق قورعانىس» ماسەلەسى بويىنشا بىرلەسىپ جۇمىس ىستەيدى.
باسىلىمنىڭ جازۋىنشا، ا ق ش ۇلتتىق اەروناۆتيكا جانە عارىش اكىمشىلىگى (NASA) جۋىقتا 2024 YR4 استەرويدىنىڭ 2032 -جىلى جەرگە سوقتىعىسۋ ىقتيمالدىعى %2 ەكەنىن مالىمدەگەن. اسپان دەنەسى العاش رەت 2023 -جىلدىڭ 27 -جەلتوقسانىندا انىقتالعان بولاتىن.
قازىرگى ۋاقىتتا بۇل استەرويد 48 ميلليون شاقىرىم قاشىقتىقتان جەرگە قاراي ۇشىپ كەلەدى. استەرويدتىڭ جەرگە سوقتىعىسۋ ىقتيمالدىعى وتە تومەن بولسا دا، عالىمدار ونى ءبارىبىر مۇقيات باقىلاپ، قوسىمشا دەرەكتەر الۋعا تىرىسىپ وتىر.
عالىمداردىڭ ەسەپتەۋىنشە، بۇل استەرويدتىڭ ديامەترى 40-90 مەتر ارالىعىندا. دەمەك، ول «جانالعىش» دەڭگەيىندەگى استەرويدتار قاتارىنا جاتپايدى.
«جانالعىش» دەڭگەيىندەگى استەرويدتار - ديامەترى 1 شاقىرىم نەمەسە ودان دا ۇلكەن عارىش تاستارى، ولار جەردەگى تىرشىلىككە ورنى تولماس اپات اكەلۋى مۇمكىن.
