قىتاي الەمدە العاشقى بولىپ ۇشقىشسىز ۇشاتىن اۋە تاكسيلەرىنىڭ قىزمەتىنە رۇقسات بەردى
ولار سەنبى كۇنى اۋە تاسىمالى وپەراتورلارىنىڭ سەرتيفيكاتىن الىپ، ەندى قىتايدا جولاۋشىلاردى تاسىمالداۋ مەن قالالىق اۋە ەكسكۋرسيالارىن ۇسىنۋ مۇمكىندىگىنە يە بولدى.
قىتاي ازاماتتىق اۆياتسيا باسقارماسى (CAAC) العاش رەت ەكى كومپانياعا ۇشقىشسىز ۇشاتىن جولاۋشىلار دروندارىن كوممەرتسيالىق ماقساتتا پايدالانۋعا رۇقسات بەردى. بۇل - الەمدەگى العاشقى رەسمي ليتسەنزيا.
رۇقساتقا يە بولعان ەكى كومپانيا - Nasdaq-تا تىركەلگەن EHang Holdings جانە Hefei Hey Airlines. ولار سەنبى كۇنى اۋە تاسىمالى وپەراتورلارىنىڭ سەرتيفيكاتىن الىپ، ەندى قىتايدا جولاۋشىلاردى تاسىمالداۋ مەن قالالىق اۋە ەكسكۋرسيالارىن ۇسىنۋ مۇمكىندىگىنە يە بولدى.
سيتيك سەكيۋريتيز (Citic Securities) زەرتتەۋ ورتالىعىنىڭ مالىمەتىنشە، بۇل سەرتيفيكات سوڭعى رەتتەۋ كەدەرگىسىن جويدى. بۇعان دەيىن كومپانيالار تيپتىك سەرتيفيكات، وندىرىستىك سەرتيفيكات جانە ۇشۋ جارامدىلىعى سەرتيفيكاتىن العان.
«ءبىز تومەن بيىكتىكتەگى تۋريزم وسى جاڭا سالانىڭ باستاماسى بولادى دەپ ەسەپتەيمىز»، - دەلىنگەن Citic Securities بايانداماسىندا. «EHang-نىڭ قالالىق ەكسكۋرسيالىق قىزمەتتەرى بۇل سالانىڭ دامۋىن جەدەلدەتۋى مۇمكىن».
قىتاي بيلىگى تومەن بيىكتىكتەگى اۆياتسيانى دامىتۋ بويىنشا بەلسەندى قادامدار جاساۋدا. بۇل باعىتقا جەتكىزۋ دروندارى، ديريجابلدەر جانە ۇشاتىن كولىكتەر سياقتى جاڭا تەحنولوگيالار كىرەدى. قىتاي پرەمەرى لي چيان ناۋرىز ايىندا ۇلتتىق حالىق كونگرەسىندە سويلەگەن سوزىندە بۇل سالانى بيو ءوندىرىس، كۆانتتىق ەسەپتەۋ، جاساندى ينتەللەكت جانە 6G بايلانىسى سەكىلدى ەكونوميكانىڭ ماڭىزدى قوزعاۋشى كۇشتەرىنىڭ ءبىرى رەتىندە اتادى.
قىتاي اقپاراتتىق قاۋىمداستىعىنىڭ تومەن بيىكتىكتەگى ءبولىمىنىڭ ۆيتسە-پرەزيدەنتى چەن بوليننىڭ ايتۋىنشا: «تومەن بيىكتىكتەگى ەكونوميكا - قىتاي ەكونوميكاسىنىڭ قارقىندى دامۋىن قامتاماسىز ەتەتىن جاڭا قوزعالتقىش».
HuRun زەرتتەۋ توبىنىڭ بولجامى بويىنشا، 2025 -جىلعا قاراي بۇل سالانىڭ قۇنى 1,5 تريلليون يۋانعا (207 ميلليارد ا ق ش دوللارى) جەتەدى، ال 2035 -جىلعا قاراي 2,5 تريلليون يۋانعا دەيىن وسەدى.
قىتايداعى باستى ويىنشىلاردىڭ قاتارىندا EHang, Feihang Aviation سىندى ستارتاپتار مەن Xpeng, Geely سياقتى ءداستۇرلى اۆتوكونتسەرندەر بار. ولار Boeing, Airbus, Embraer سەكىلدى ءىرى حالىقارالىق كومپانيالارمەن باسەكەلەسۋدە.
«بولاشاقتا تومەن بيىكتىكتەگى اۆياتسيانى قولدايتىن ساياساتتار ىسكە اسىرىلا كەلە، بۇل سالاداعى باسەكەلەستىك كۇشەيە تۇسەدى»، - دەلىنگەن HuRun بايانداماسىندا.
