قىتاي 70 جىلدان كەيىن زەينەتكە شىعۋ جاسىن ۇزارتتى
استانا. قازاقپارات- كورشىمىز قىتايدا 70 جىلدان كەيىن العاش رەت زەينەت جاسىن كوتەردى. ەل پارلامەنتى 1950 -جىلدان بەرى ءبىرىنشى رەت زەينەتكەرلىك جاستىڭ ءوسۋىن ماقۇلدادى. ەر ادامداردىڭ دەمالىسقا شىعۋ جاسى 60-تان 63 جاسقا ۇلعايسا، ايەلدەر ءۇشىن 50-دەن 55-كە ءوستى.
ال باسشىلىق لاۋازىمداعى ايەل ادامدار 58 جاستا عانا زەينەتكە شىعا الادى. زاڭعا سايكەس بۇل ءوسىم كەلەر جىلى باستالىپ، 15 جىلعا سوزىلادى. سونداي- اق 2030 -جىلدان باستاپ زەينەتاقى الۋ ءۇشىن جارنا تولەمىنىڭ ەڭ تومەنگى مەرزىمى 15 جىلدان 20 جىلعا دەيىن ۇلعايادى. تاعى ءبىر وزگەرىس، جۇمىس بەرۋشىنىڭ كەلىسىمىمەن قىزمەتكەرلەر زەينەتكە كەيىنىرەك شىعۋىنا بولادى. ءبىراق بۇل مەرزىم ءۇش جىلدان اسپاۋعا ءتيىس.
ۋاڭ شياوپيڭ، ادامي رەسۋرستار جانە الەۋمەتتىك قامسىزداندىرۋ ءمينيسترى:
- مەملەكەتتىك كەڭەس قىتايدا زاڭمەن بەلگىلەنگەن زەينەتكەرلىك جاستى بىرتىندەپ ارتتىرۋ تۋرالى زاڭ جوباسىن ماقۇلدادى. بۇل شەشىم ەلدەگى احۋالدى سارالاپ، ءارتۇرلى فاكتورلاردى جان-جاقتى تالداۋدان كەيىن عانا قولدانىسقا ەنگىزىلدى. ءسويتىپ زەينەتكە شىعۋ جاسى جوسپارلى جانە رەتتەلگەن تۇردە جۇزەگە اسىرىلادى.
24.kz
