قىتاي 2025 -جىلى شەتەلدىك ينۆەستيتسيالاردى تۇراقتاندىرۋ بويىنشا ءىس-قيمىل جوسپارىن جاريالادى
استانا. KAZINFORM - قىتاي بيلىگى سارسەنبى كۇنى مەملەكەتتىك كەڭەستىڭ جاقىندا وتكەن اتقارۋشى وتىرىسىندا تالقىلانىپ، قابىلدانعان 2025 -جىلى شەتەلدىك ينۆەستيتسيانى تۇراقتاندىرۋ جونىندەگى ءىس-قيمىل جوسپارىن جاريالادى، دەپ حابارلايدى شينحۋا اقپارات اگەنتتىگى.
مەملەكەتتىك كەڭەس كەڭسەسى تاراتقان حابارلاماعا سايكەس، ءتيىستى ءىس-شارالار جوسپارىن ەلدىڭ ساۋدا مينيسترلىگى مەن دامۋ جانە رەفورما ىستەرى جونىندەگى كوميسسياسى ازىرلەدى.
2025 -جىلى تۇراقتى شەتەلدىك ينۆەستيتسيانى قامتاماسىز ەتۋدى كوزدەيتىن جوسپاردا شەتەلدىك ينۆەستيتسيانىڭ جوعارى دەڭگەيدە اشىلۋىنا ىقپال ەتۋدىڭ نەگىزگى اسپەكتىسى جانە جاڭا وندىرگىش كۇشتەردى دامىتۋ جانە قىتايلىق ۇلگىدەگى جاڭعىرتۋدى جۇزەگە اسىرۋدا ماڭىزدى ءرول اتقاراتىنى ايتىلعان.
جوسپارعا سايكەس قىتاي پيلوتتىق ايماقتارعا قوسىمشا قۇن قوسىلعان تەلەكوممۋنيكاتسيالار، بيوتەحنولوگيالار جانە تولىعىمەن شەتەلدىك مەديتسينالىق مەكەمەلەر سياقتى سالالاردا اشىقتىق ساياساتىن ءتيىمدى جۇزەگە اسىرۋدا قولداۋ كورسەتىپ، وسى سەكتورلارداعى شەتەلدىك ينۆەستيتسيالانعان جوبالارعا ءبىر تەرەزە قىزمەتىن ۇسىنادى.
ەل بيلىگى تەلەكوممۋنيكاتسيا جانە مەديتسينالىق قىزمەت كورسەتۋ سياقتى سالالارداعى اشىقتىقتى جەدەل ارتتىرۋ ءۇشىن پيلوتتىق باعدارلامالاردى كەڭەيتۋدى جالعاستىرادى.
سونىمەن قاتار، قىتاي ءبىلىم جانە مادەنيەت سالالارىنداعى اشىقتىقتى كەڭەيتۋ جوسپارلارىن تۇجىرىمداپ، بۇل جوسپارلاردى دەر كەزىندە جاريالاپ، ولاردى بىرتىندەپ جۇزەگە اسىراتىنى كوزدەلگەن.
اۆتور
زارينا تۋعانبايەۆا
