قىستا جاقسى ۇيىقتاۋ ءۇشىن مىنا 3 ەرەجەنى ساقتاڭىز
استانا. قازاقپارات - اعزاعا پايدالى بولۋ ءۇشىن قىستا قالاي دۇرىس ۇيىقتاۋ كەرەك؟ بۇل سۇراققا Aif.ru-گە تەراپيەۆت دميتري كارپەنكو جاۋاپ بەردى.
اۋانى ىلعالداندىرۋ
قىس مەرزىمىندە جىلىتۋ ماۋسىمى باستالاتىندىقتان، ءۇي ىشىندەگى اۋا قاتتى قۇرعاپ كەتەدى. ول ۇيىقتاپ كەتۋگە جاعىمسىز اسەر ەتەدى. سوندىقتان قىستا اۋا ىلعالداندىرعىش قۇرالدار قولدانعان دۇرىس.
ۇيىقتار الدىندا سەرۋەندەۋ
قىستا فيزيكالىق جۇكتەمە دە سالىستىرمالى تۇردە از بولادى. كوپشىلىك ادام كۇن سۋىقتا جاياۋ ءجۇرۋدىڭ ورنىنا كولىكپەن جۇرگەندى ءجون كورەدى. جارىق كۇننىڭ قىسقا بولۋى دا ادامداردىڭ كوبىنە ۇيدە وتىرۋىنا اكەلەدى. ونىڭ بارلىعى ۇيقى ساپاسىنىڭ تومەندەۋىنە ءوز سەپتىگىن تيگىزەدى. سوندىقتان ۇيىقتار الدىندا سەرۋەندەپ كەلگەن پايدالى.
دەمالىس كۇندەرى كوپ ۇيىقتاماۋ
ادەتتە ادامدار جۇمىس كۇندەرى ۇيقىسى قانبايدى دا، دەمالىس كۇندەرى سونىڭ ورنىن تولتىرۋ ماقساتىندا كوپ ۇيىقتايدى. الايدا بۇل ءتيىمسىز. كەرىسىنشە، رەجيمدى بۇزباۋ كەرەك. ەڭ دۇرىسى - جۇمىس كۇندەرى مەن دەمالىس كۇندەرى ءبىر ۋاقىتتا جاتىپ، ءبىر ۋاقىتتا تۇرۋ. الايدا ماماندار كۇندە 7 ساعاتتان كەم ۇيىقتاماۋعا كەڭەس بەرەدى.
