قىستا باس كيىمسىز ءجۇرۋدىڭ قاۋپى
قىستىڭ ادام دەنساۋلىعىنا پايداسى مول. الايدا بۇل مەزگىلدە جىلى كيىنىپ ءجۇرۋ ماڭىزدى. سۋىق اۋا رايىندا كيۋ كەرەك ماڭىزدى نارسەنىڭ ءبىرى - باس كيىم. ونىڭ سەبەبىن Tengri Life ءتۇسىندىرىپ بەردى، - دەپ حابارلايدى Massaget.kz ءتىلشىسى.
كوپشىلىك ادام سۋىق اۋا رايىندا دا باس كيىمسىز ءجۇرۋدى ءجون كورەدى. ولار باس كيىمگە اسا ءمان بەرمەيدى نەمەسە ءوزىنىڭ يممۋندى جۇيەسىنە سەنەدى. الايدا سۋىق اۋا رايىندا باس كيىم كيمەۋدىڭ ادام دەنساۋلىعىنا قاۋىپتى سالدارلارى بولۋى مۇمكىن. باس كيىمنىڭ باستى پايداسى - ونىڭ باستى سۋىقتان قورعاۋى.
باس اۋىرۋى مۇمكىن
باس - دەنەمىزدەگى ەڭ سەزىمتال بولىكتىڭ ءبىرى، سەبەبى ودان قان تامىرلاردىڭ كوپ بولىگى وتەدى. ەگەر باسىڭىز سۋىقتاسا، ول قان تامىرلاردىڭ تارىلۋىنا اكەلىپ، ونىڭ سالدارىنان ميدى قانمەن قامتاماسىز ەتۋ تومەندەۋى مۇمكىن. بۇل باس اۋرۋىن، باس اينالۋدى، زەيىن قويۋدىڭ جوعالۋى جانە باسقا دا دەنساۋلىققا قاتىستى پروبلەمالاردى تۋدىرۋى مۇمكىن.
جىلۋ جوعالتۋ
باس كيىم كيۋ اعزاداعى جىلۋدى ساقتاۋعا كومەكتەسەدى. باس جىلۋ جوعالاتىن نەگىزگى نۇكتەلەردىڭ ءبىرى. باس كيىمنىڭ ىشىندەگى جىلى اۋا جىلۋدى ساقتاۋعا كومەكتەسەدى.
تۇماۋراتىپ قالۋ قاۋپى جوعارى
باس كيىم سۋىقتان عانا ەمەس، جەلدەن دە قورعايدى. قىستا جەل قاتتى سوعادى، ول باسىڭىزدى جىلدام سالقىنداتىپ جىبەرەدى. مۇنداي كۇندەرى باس كيىمسىز ۇسىك الۋ نەمەسە تۇماۋراتىپ قالۋ قاۋپى بار.
شاش زاقىمدالۋى مۇمكىن
سۋىق اۋا شاشتى جانە باس تەرىسىن قۇرعاتىپ جىبەرەدى. سوندىقتان شاشىڭىز سىنعىش بولىپ كەتۋى مۇمكىن. باس كيىم شاشىڭىزدى سىرتقى ورتا اسەرىنەن قورعاۋعا كومەكتەسەدى.
