قىسقى تۋريزم: اقمولادا قىس ايلارىندا قايدا دەمالۋعا بولادى

وڭىردە جۇمىس ىستەپ تۇرعان قوناق ۇيلەردەن بولەك، كۋرورتتىق ايماقتا قىسقى تۋريزم قىزمەتتەرىن «وقجەتپەس»، «الماز»، «شۋچينسكي»، س.سەيفۋللين اتىنداعى «تەرراسسالار پاركى»، «سامال»، «ديسكاۆەري بۋراباي»، «گراند پريكس»، «زەرەن» ءتارىزدى شيپاجايلار ۇسىنادى.
قىس مەزگىلىندە تۋريست تارتۋ ءۇشىن شيپاجايلاردا جىل سايىن كورسەتىلەتىن قىزمەتتەردىڭ سپەكترى كەڭەيىپ كەلەدى.

ونىڭ ىشىندە مۇز ايدىندارى قۇيىلىپ، شاڭعى مارشرۋتتارى سالىنۋدا، سونداي- اق، شاڭعى، كونكي، سنوۋبورد، قاردا جۇرەتىن كولىكتەردى جالعا بەرۋ ورىندارى اشىلىپ جاتىر.

كاسىبي شاڭعى اۋەسقويلارى «ەلىكتى پارك»، «نۇرتاۋ» جانە «اق جەلكەن» تاۋ شاڭعى كۋرورتى مۇمكىندىكتەرىن پايدالانادى.

ەكسترەمالدى اۋەسقويلار ءۇشىن «Rixos Borovoe» قوناق ءۇيىنىڭ اۋماعىندا «ەكستريم پارك» جۇمىس ىستەيدى.

تۋريستەردى قىزىقتىراتىن ورىن - «بۋراباي لەند» ويىن- ساۋىق پاركى.

ول قىسقى ويىن- ساۋىقتىڭ بۇكىل سپەكترىن ۇسىنادى (حاسكي شانا، اتپەن سەرۋەندەۋ، شانامەن سىرعاناۋ، كونكي تەبۋ، كۆادراتسيكل، قاردا جۇرەتىن كولىكتەردى پايدالانۋ).

ويىن-ساۋىق ساياباعىندا ەرەسەكتەر مەن بالالارعا ارنالعان اتتراكسيوندار، شامان اۋىلى، فوتوسۋرەتكە ءتۇسۋ ايماعى بار.

سونداي- اق، كىشكەنتاي قوناقتار ءۇشىن «اياز اتا رەزيدەنسياسى» جۇمىس ىستەيدى.

جىل سايىن بالالار ويىن-ساۋىق كەشەنى بازاسىندا 50 مىڭعا دەيىن تۋريستكە قىزمەت كورسەتىلەدى.
حالىقارالىق دەڭگەيدەگى جارىستار شۋچە قالاسىنداعى وليمپيادالىق دايارلاۋ ورتالىعىنىڭ اۋماعىندا وتكىزىلەدى.

قىستا مۇندا كاسىبي شاڭعىشىلار مەن سپورتشىلار ءۇشىن 20-دان استام سپورت شارالارى وتەدى.

- وتكەن جىلدىڭ قورىتىندىسى بويىنشا اقمولا وبلىسى قازاقستانداعى تۋريزمدى دامىتۋ درايۆەرلەرىنىڭ بەستىگىنە كىردى. وڭىردە تۋريزمدى دامىتۋ گەوگرافياسى كەڭەيۋدە. بۋراباي باس كۋرورتىنان باسقا، زەرەندى جانە ەلوردالىق تۋريزمدى دامىتۋ ايماقتارى دامۋدا، - دەيدى اقمولا وبلىسى تۋريزم باسقارماسىنىڭ ءبولىم باسشىسى ەرنازار قۇتتىعوجين.

استانا قالاسىنىڭ قالا ماڭىنداعى ايماعىندا قىسقى تۋريزم قىزمەتتەرىن ۇسىناتىن ءبىرقاتار اباتتاندىرىلعان دەمالىس ايماقتارى بار، ونىڭ ىشىندە ارشالى اۋدانىندا «بەيبارىس» دەمالىس بازاسى، اقكول اۋدانىندا «ARKA TOUR» ج ش س شاڭعى بازاسى، «Shar Zhum» دەمالىس ورتالىقتارىنا كەلۋشىلەر سانى جىلدان جىلعا ارتىپ كەلەدى.
قالا ماڭىنداعى دەمالىستى ودان ءارى دامىتۋ ءۇشىن سەلينوگراد اۋدانىندا «تاۋ پاركى» دەمالىس ايماعىنىڭ قۇرىلىسى جوباسى (سىرعاناقتار، مۇز ايدىنى، شاڭعى، قاردا جۇرەتىن كولىكتەر، اتپەن ءجۇرۋ) جۇزەگە اسىپ جاتىر.
ساندىقتاۋ اۋدانىندا شاڭعى-روللەر بازاسىندا جىل سايىن شاڭعى سپورتى ارداگەرلەرىنىڭ ءداستۇرلى شاڭعى مارافونى وتكىزىلەدى.

وبلىستا «Four Seasons» كۇنتىزبەلىك ءىس- شارالار جوسپارىنا سايكەس تۇراقتى نەگىزدە قىس مەزگىلى مەن ماۋسىمارالىق كەزەڭدە كۋرورتتىق ايماقتىڭ جۇكتەلۋىن قامتاماسىز ەتۋگە مۇمكىندىك بەرەتىن ءبىرقاتار ءىس-شارالار ۇيىمداستىرىلادى.
كەشە، 17-جەلتوقساندا بۋراباي كۋرورتىندا قىسقى ماۋسىم اشىلدى.

ايتا كەتسەك، بۇدان بۇرىن بۋرابايعا ءبىر جىلدا 1 ميلليون شەتەلدىك تۋريست كەلەتىنىن جازعان ەدىك.
اۆتور
اسلان وسپانوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى