قىسقى ازيا ويىندارىندا التىننان ءۇمىت بار ما - مينيستر بولجامى
استانا. KAZINFORM - تۋريزم جانە سپورت ءمينيسترى ەربول مىرزابوسىنوۆ قىتايدا وتەتىن قىسقى ازيا ويىندارىنان ەل قورجىنىنا تۇسەتىن مەدالدارعا بولجام جاسادى.
- الدىڭعى ازيا ويىندارىندا جالپى كوماندالىق ەسەپتە ءتورتىنشى ورىنعا تۇراقتادى. بۇل جولى ازيا ويىندارىندا كونكيمەن جۇگىرۋ، شورت-ترەك، شاڭعى سپورتى جانە بياتلون سەكىلدى سپورت تۇرلەرىنەن التىن مەدالعا ءۇمىت ارتىپ وتىرمىز، - دەدى ەربول مىرزابوسىنوۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا.
وسىلايشا مينيستر وتاندىق سپورتشىلاردىڭ جۇيەلى دايىندالعانىن ايتىپ، وڭ ناتيجە كۇتىپ وتىر.
- جوعارىدا اتالعان ءتورت سپورت تۇرىنەن ءبىزدىڭ كوماندا كۋبوك كەزەڭىندە جوعارى ناتيجە كورسەتتى، قىسقى ويىنداردا دا سول ناتيجەنى جوسپارلاپ وتىر. بۇل جاي عانا بولجام ەمەس — ازيا ەلدەرى اراسىنداعى اعىمدىق ناتيجەلەر بويىنشا ءبىزدىڭ سپورتشىلار كوشباسشى، - دەپ تولىقتىردى ۆەدومستۆو باسشىسى.
ايتا كەتەيىك، قىسقى ازيا ويىندارىندا قازاقستان سپورتشىلارى 51 مەدال جيىنتىعى ءۇشىن كۇرەسەدى. ايتۋلى سپورت باسەكەسىندە ەلىمىزدىڭ نامىسىن 138 سپورتشى قورعايدى.
