قىسقى ازيا ويىندارى: قىتاي قۇراماسىندا ونەر كورسەتكەن ءتورت قازاق ءۇش «التىن» ەكى «قولا» الدى
حاربين. KAZINFORM - قىتايدىڭ حاربين قالاسىندا ءوتىپ جاتقان Ⅸ قىسقى ازيا ويىندارىندا قىتاي ۇلتتىق قۇراماسى ساپىندا ۇلتى قازاق ءتورت سپورتشى قاتىسىپ، تورتەۋى دە جۇلدە تۇعىرىنان كورىندى.
ەڭ اۋەلى، سامعار سەرىك ۇلى ەرلەر اراسىندا شاڭعىمەن سىرعاناۋدان سپرينت باعدارلاماسىندا ونەر كورسەتىپ، 2 مينۋت 58.51 سەكۋند ناتيجەسىمەن قولا مەدال ەنشىلەدى.
ءدال وسى سىندا قازاقستاندىق كونستانتين بورتسوۆ «كۇمىس» ەنشىلەگەن بولاتىن. سپورتشىلار مارە سىزىعىن ءۇشىنشى جانە ءتورتىنشى بولىپ كەسكەنىمەن، ەكىنشى ورىن العان جاپوندىق سپورتشى ەرەجە بۇزۋىنا بايلانىستى ناتيجەسى جويىلدى.
سول سەبەپتى، كونستانتين بورتسوۆ «كۇمىس» السا، قانداسىمىز سامعار سەرىك ۇلى قولا جۇلدەگەر اتاندى.
قازاق قىزى بايان جالىن قىزى شاڭعى جارىسىنان ايەلدەر اراسىندا 5 شاقىرىمعا سىرعاناۋدان (ەركىن ستيل) 12 مينۋت 07.5 سەكۋند ناتيجە كورسەتىپ، حاربين قىسقى ازيا ويىندارىنىڭ چەمپيونى اتاندى.
ايتا كەتەرلىگى، وسى جارىسقا قازاقستاندىق سپورتشىلار داريا رياجكو، نادەجدا ستەپاشكينا، كسەنيا شالىگينا جانە انگەلينا شۋرىگا قاتىستى. قورتىندىسىندا نادەجدا ستەپاشكينا مارە سىزىعىن بەسىنشى كەسسە، كسەنيا شالىگينا جەتىنشى، انگەلينا شۋرىگا مەن داريا رياجكو سەگىزىنشى- توعىزىنشى ورىننان كورىندى.
قاناعات مۇحاممەد ۇلى قىتاي قورجىنىنا ەكى بىردەي جۇلدە سالدى. ول الدىمەن 5000 مەتر قاشىقتىققا كونكيمەن جۇگىرۋدەن قولا مەدالعا قول جەتكىزدى. قانداسىمىز اتالعان قاشىقتىقتى 6:31.54 سەكۋندتا جۇگىرىپ ءوتتى.
سونىمەن قاتار، قاناعات قىتاي قۇراماسى ساپىندا كونكيمەن جۇگىرۋدەن ەرلەر اراسىندا كوماندالىق ءىز قۋۋ دوداسىندا التىن مەدالدى جەڭىپ الدى.
قىتاي قۇراماسىنىڭ سپورتشىسى اقنار اداق قىزى ايەلدەر اراسىندا كونكيمەن جۇگىرۋدەن كوماندالىق ءىز قۋۋ جارىسىندا ازيادا چەمپيونى بولدى. قىتاي قۇراماسىنىڭ ناتيجەسى - 3 مينۋت 02.75 سەكۋند.
ايتا كەتەرلىگى، وسى جارىستا قازاقستاندىق نادەجدا موروزوۆا، ماريا دەگەن جانە كريستينا شۋمەكوۆا جارىس جولىنا شىعىپ، وكىنىشكە قاراي جۇلدەگە ىلىنە المادى.
وسىلايشا، قىتاي قۇراماسىنداعى 4 قازاق سپورتشىسى قىسقى ازيا ويىندارىندا 3 التىن جانە 2 قولا مەدال ەنشىلەدى.
مۇحتار قاليموللا ۇلى
